Кәмила Құдабаева

Кәмила Құдабаева — 1939 жылы 18 мамырда Алматы облысының Талдықорған қаласында дүниеге келген. Қазақ мемлекеттік университетінің журналистика факультетін бітірген соң, Қарағанды, Жезқазған облыстық газеттерінде, радио және теледидар редакцияларында, республикалық «Жалын» баспасында, Қазақстан Республикасы Жоғарғы Сотының «Тура би» журналында жауапты шығармашылықтың қызмет атқарды. «Позиция — К2» (орыс тілінде) республикалық қоғамдық-саяси газетінде, «Партия» газетінде, республикалық «Бөбек» ғылыми орталығында жұмыс істеген. Қазір республикалық «Ару жан» атты қоғамдық әйелдер журналы бас редакторының орынбасары.

«Қызыл көйлекті қыз», «Раушан гүлдер», «Ұйқысыз түн дер», «Ең сұлу әйел» «Бидайшы бабаның арғы аталары мен кейінгі ұрпақтары» атты прозалық кітаптары «Жазушы», «Жалын» баспаларынан басылып шықты. «Қара кемпір», «Көзжасы», «Тіріжетім», «Жалғыздық» атты әңгімелері, «Айдана», «Қысқа интервью» повестері бар. 2004 жылы «Жазушы» баспасынан «Жалғыз хат» атты кітабы жарық көрді. Қарақалпақ жазушысы Т.Қайыпбергеновтің жас-өспірімдерге арналған повестерін, орыс жазушысы Г.Немченконың балаларға арналған повестері мен әңгімелерін Ю.Виноградовтың «Рахмет саған, ұстазым», «Қиқар қызыл әтеш», «Тәтті каторга» сияқты шығармаларын қазақ тілше аударды.«Баспасөз үздігі» белгісімен марапатталған, Валентин Пикуль атындағы Халықаралық әдеби сыйлықтың лауреаты (2008), алтын медалінің иегері.