Көзілдірікті жылан — аспидтер тұқымдасының бір туысы. Ұзындығы 4,5 м-ге дейін жетеді. Африка мен Оңтүстік Азияда тараған 6 түрі бар. Көзілдірікті жыландардың көбірек тараған түрі үнді Көзілдірікті жыланы. Мұның ұзындығы 160-180 см. Көзі үлкен емес, қарашығы дөңгелек, жоғарғы жақ сүйегінде екі улы тісі болады. Түсі сарғылт сұр, қоңыр кейде қара. Қауіп төнгенде денесінің алдыңғы жағын тік көтеріп, басын жауына қарай иіп, 8 жұп мойын қабырғасын екі жағына жазады. Бұл кезде мойыны жалпақтанып, кеңейіп, мойын терісінің сырт жағында көзілдірік тәрізді дақтар пайда болады. ССР-де Үнді Көзілдірікті жыланның түр тармағы- орта азиялық Көзілдірікті жылан Түрікмен ССР-інің оңт.- батысында таралған. Ұзындығы 175 см-ге дейін. Бұл жылан осы аймақтарда тау етектерін мекендеп, 1500 м биіктікте кездеседі. Көзілдірікті жылан әсіресе көктемде қауіпті, бұл кезде ол күндіз кездеседі. Жемі-жасыл құрбақа, көл бақа, кесіртке, ұсақ құстар. Июльде ұзындығы 35 мм-дей 8-12 жұмыртқа салады, одан сентябрьде 30 см-дей жас Көзілдірікті жылан шығады. Көзілдірікті жыланның уы өте күшті болғанмен, бұл адамға аса қауіпті жылан емес, өйткені ол гюрза, сұр жылан т.б. сияқты бірден шықпайды, әуелі айбат шегеді.
