Көрсетім

Көрсетім – қылмыстық және азаматтық істерді, әкімшілік құқық бұзушылық туралы істерді дұрыс шешу үшін пайдаланылатын дәлелдеме түрлерінің бірі; адамның заңда белгіленген тәртіппен, жауап алу кезінде сұралған айғақтық деректер туралы хабарлауы. Куә мен жәбірленуші үшін К. беру құқық және міндеттілік (ҚР Қылмыстық іс жүргізу кодексі, 68, 69-баптар), ал сезікті мен айыпталушы үшін тек қана құқық болып табылады (аталмыш Кодекстің 75, 82-баптары). ҚР Конституциясының 77-бабының 3-тармағының 7-тармақшасына сәйкес ешкім өзіне-өзі, жұбайына, заңмен белгіленген шектегі жақын туыстарына қарсы айғақ беруге міндетті емес. Сондай-ақ, діни қызметшілер өздеріне сеніп сырын ашқандарға қарсы куәгер болуға міндетті емес. Заң айыпталушыдан және басқа адамдардан зорлық көрсету, қоқан-лоққы жасау, бопсалау, қорлау, азаптау жолымен күштеп К. алуға тыйым салады. Тергеуші немесе алдын ала анықтау ісін жүргізуші тарапынан аталмыш заңсыз әрекеттер жолымен сезіктіні, жәбірленушіні, куәні К. беруге мәжбүр ету (тәни немесе рухани қыстау) қылмыс болып табылады және ҚР Қылмыстық кодексінің 355-бабына сәйкес жазаға тартылады. Сондай-ақ, көрінеу жалған К. беру де (осы Кодекстің 352-бабы), К. беруден бас тарту немесе жалтару да (осы Кодекстің 353-бабы) қылмыс болып табылады; қ. Көрінеу жалған көрсетім.