Көрінеу жалған көрсетім

Көрінеу жалған көрсетім – қылмыстық құқықта – сотта, алдын-ала тергеу немесе алдын ала анықтау ісін жүргізуде куәнің немесе жәбірленушінің айғақтарды әдейі жасыруы, шындықты, оқиғаны саналы түрде бұрмалауы арқылы жасалатын қылмыс. Оның қауіптілігі мынада: жалған көрсетім салдарынан кінәсіз адамның сотталуы немесе қылмыскердің ақталуы мүмкін. Сарапшының көрінеу жалған қорытындысы, аудармашының көпе-көрінеу бұрыс аударуы К. ж. к-ге теңестіріледі. Қателесу, адасу немесе құзыреттіліктің жеткіліксіздігі себепті ақиқаттың бұрмалануынан К. ж. к-ді ажырата білу керек. Заңға сәйкес (мыс., Қазақстан Республикасының қылмыстық іс жүргізу кодексі, 95, 96-баптар) сарапшы немесе аудармашы құзыреттілігінің жеткіліксіздігі оларға қарсылық білдіруге негіз болады. Куәнің (жәбірленушінің) көрсетімін бағалау кезінде оның ақиқатты ұмыту салдарынан, әлде аңғармастықпен, байқамай немесе қасақана бұрмаламағаны ескеріледі. Шындық қасақана бұрмаланған жағдайда ғана К. ж. к. үшін Қазақстан Республикасы қылмыстық кодексінің 352-бабы бойынша жауапқа тартылады. Осы бапқа берілген ескертуге сәйкес куәгер, жәбірленуші, сарапшы немесе аудармашы алдын ала анықтау, алдын ала тергеу немесе сот талқылауы барысында, сот үкім немесе шешім шығарғанға дейін өзі берген көрсетім деректерінің жалғандығын өз еркімен мәлімдесе, олар қылмыстық жауаптылықтан босатылады. Айыпталушы мен сотталушы К. ж. к. үшін жауапқа тартылмайды.