Көтерме

Көтерме – 1) Жер бедеріне қарай салынған арықтың, су жолының түрі. Қазып келе жатқан арықтың деңгейінен төменірек, ойпаң жер кездескенде, К. жасайды. К-ні істегенде арық жолын қазбай, екі жағын топырақпен, таспен үйіп, су іркілмей ағатын етіп, ой жерді көтереді. Мұны кейде көтерме арық деп те атайды. 2) Ат бәйгесінде шапқан ат қарақшыға, сөреге жақындағанда шылбырынан тартып, дүбір қосып, қиқулап, демеген адамдарға ат иесі тарапынан бәйгеден берілетін үлес, сыйлық. 3) Ат шана, арба әбзелі, енін 1,5 – 2 елідей етіп тілген ұзын қайыс. Ол екі жетекті ершікке көтеріп байлап, бекіту үшін пайдаланылады.