Лесото коммунистік партиясы

Лесото коммунистік партиясы (ЛКП) – 1962 жылы 5 мамырда партияның программасы мен уставы қабылданған Құрылтай съезінде негізі қаланды. Программада Лесото коммунистік партиясы « Лесото Социалистік Республикасын құру мақсатын алға қойған жұмысшылар мен шаруалар партиясы» деп көрсетілген. Лесото коммунистік партиясы елдегі барлық саяси партиялардың прогресшіл күштерімен қарым-қатынас жасайды; бүгінгі таңдағы басты міндет: «қазіргі неоколониалдық тәртіпті жойып, оны экономикалық тәуелсіздік және әлеуметтік прогресс саясатын жүргізетін үкіметпен алмастыру үшін» демократиялық күштердің Біріккен майданын құру деп санайды. 1970 жылы ақпанда Лесото коммунистік партиясына тыйым салынды, партияның бас секретары Дж. Кена және председателі Ф. Матжи т. б. тұтқынға алынды. Лесото коммунистік партиясы өз жұмысын астыртын жағдайда одан әрі жүргізуде.

Лесото коммунистік партиясы делегациясы Коммунистік және жұмысшы партияларының 1969 жылғы (Мәскеу) халықаралық кеңесіне қатысып, онда қабылданған документтерді мақұлдады. Лесото коммунистік партиясы демократиялық централизм негізінде құрылған. Жоғарғы органы – ұлттық конференция, конференциялар аралығында – ОК, ол Саяси бюро сайлайды. Партияға тыйым салынғанға дейін «Мажаммохо» журналын шығарып келді.