Лугилер

Лугилер (лигиліктер) — Б.з басында римдіктерге қарсы белсенді соғыстар жүргізген ежелгі герман тайпасы. Олар қазіргі Польша жеріндегі Висло-Одер өзендерінің аралығында өмір сүрген, Пшевор мәдениетін ұстанған. Гермундурлармен бірге квадтарға римдіктер жіберген патша—Ванниді қууға көмектескен. 84 жылы Домициан патшаның кезінде олар квадтарды өздеріне бағындырады. Б.з III ғасырында Халықтардың Ұлы көші кезінде олар ыдырап, готтармен араласып кетеді. Лугилер тайпалары біраз майда тайпалар мен тайпалар одағынан тұрған. Ол тайпалардың әрқайсысының өздерінің орталықтары болған. Бұны Тацит civitates деп атап, оған лугилердің басқаруын, жалпы өмірлерін, аумағын суреттеген. Луги тайпалар бірлестігіне Тацит гари, гельвекон, маним, гелизи және наганарвал тайпаларын жатқызған. Олардың шығу тегін кельттермен немесе герман тайпаларымен байланыстырады. Атының шығу тегі кельт тайпаларындағы Луги құдайының атымен байланысты болуы мүмкін. Олардың шығу тегі полабтық славян тайпалары лужичандармен де байланыстырылады. Қазіргі ғалымдар олар әр түрлі тайпалардың бірігуінен туған деп санайды.