Маржан Тасова

Маржан Тасова (22 қазан 1923 жыл, Шымкент облысы, Әл-Фараби ауданы) — педагог, Қазақ КСР-нің озат мұғалімі, КСРО-ның озат мұғалімі, Еңбек ардагері, Социалистік Еңбек ері, т.б. көптеген марапаттардың егесі.

Өмірдерек

Маржан Тасова орталау мектепті бітіргеннен кейін 1940 жылы Түркістан педучилищесін тәмамдайды. Білімін одан әрі толықтыру мақсатында Шымкент қаласындағы Крупская атындағы оқытушылар институтына түседі. Жоғары оқу орнының бірінші курсында оқып жүрген кезінде Ұлы отан соғысының басталуына байланысты оқуды тастап, Алғабас ауданында Төрткүл орталау мектебінде қазақ тілі сабағынан оқытушы болып еңбек жолын бастады. Соғыстан соң білімін қайта жалғау мақсатында 1948 жылы мұғалімдер институтын, одан кейін 1956 жылы Алматы пединститутын бітіреді.

• 1943-1946 жылдары Қызылқұм (қазіргі Әл-Фараби ауданы), Отырар орталау мектебінде директор болып жұмыс істейді.
• 1946-1952 жылдары Шымкент облыстық партия комитетінде нұсқаушы, қалалық партия комитетінде бөлім бастығы болып қызмет атқарады.
• 1952-1959 жылдары Шымкент қаласында Спатаев атындағы №7 мектепте директордың оқу жөніндегі орынбасары міндетін атқара жүріп, сол мектепте қазақ тілі мен әдебиеті пәнінен оқушыларға дәріс береді.
• 1960 жылы Шымкент қаласында №2 қыздар интернатында директор болады.
• 1961 жылдан 1984 жылға дейін Қазақ КСР-інің 40 жылдығы атындағы №12 мектеп-интернатының алғашқы директоры болып жұмыс істейді. 1984 жылы құрметті демалысқа шықты.
• 1984-1987 жылдар арасында облыстық педагогикалық қоғамының бастығы болды.

Маржан Тасова еңбек жолында облыстық Кеңестің және қалалық Кеңестің бірнеше дүркін депутаты болып сайланды. Сондай-ақ, қалалық партия комитетінің пленум мүшесі, республикалық профсоюздың пленум мүшесі, облыстық профсоюздың президиумының мүшесі болып бірнеше дүркін сайланды. Кеңес өкіметі кезінде болған мұғалімдердің II, III сьезіне делегат болып қатысты.

«Мектеп-интернат және эстетикалық тәрбие» деген еңбегін бүкіл республикадағы мектеп-интернат басшыларының арасында өзінің жұмыс жүргізу әдісін жазып, пікір алысып, педагогикалық оқуларда баяндама жасады. Кітапшасы облыс, республика көлеміндегі таралымдарда жарық көрді. Бірнеше рет Шымкенттегі оқытушылардың білімін жетілдіру институты плакат шығарып, қазақ тілі мен әдебиеті сабағында эстетикалық тәрбие және тағы басқа әдістерін облыс көлемінде таратты.

Маржан Тасова өз еңбегін халықпен пікірлесіп, халық ойын ескеріп оқыту мен тәрбиенің жастар арасында қалай жеткізу жөніндегі жас мұғалімдермен кездесу, оларға берген тәлімгерлік кеңестері орталық , облыстық газет-журналдарда жарық көріп отырады. Осындай өнегелі ұстаздың алдында білім нәрімен сусындаған оқушылары бұл күнде республика көлемінде басшы қызметтерде, қазақ академиясында, жоғары оқу орындарының ректоры кызметінде, шаруашылық саласындағы басшылық қызметтерде, сонымен қатар облыс көлеміндегі мектептерде оқытушы болып жұмыс істеуде.

Бүгінде Маржан Тасқызы өзінің қолында тәрбиеленген академик Ө.Жолдасбеков, С.Темірбеков, Ә.Монтаев, Е.Мырзаев, Ә.Әлиев, Т.Қазақбаев, Т.Қалменов, А.Ақаев, Ж.Түймебаев тағы басқа көптеген оқушыларының еңбектерін айтып мақтан ете алады.

1977 жылы қазан айында Маржан Тасқызы Моңғолия халық республикасына Шымкент облыстық партия комитетінің делегациясымен бірге барып қайтты. Ұзақ жылғы еңбегінің қорытындысында

Марапаттары

• 1941-1945 жылдары «Ұлы Отан соғысы кезіндегі үздік еңбегі үшін» медалі,
• «Еңбек Қызыл Ту» ордені,
• «Қазақ КСР-нің озат мұғалімі»,
• «КСРО-ның озат мұғалімі»,
• «Ұлы Отан соғысының 20 жылдығы» және 30,40,45 жылдары медальдарымен,
• «Еңбек ардагері», кешегі Кеңес Одағының ең жоғары атағы,
• «Социалистік Еңбек ері» деген атақ берілді. Маржан Тасқызы еңбектің ғана майталманы емес, отбасында жолдасы Хайролла екеуі екі ұл, бір қыз тәрбиелеп өсірген. Қызы Шолпан ғылыми қызметкер, ұлдары жоғары білімді, қызмет істейді.