Мулхақат әс-сурах

“Мулхақат әс-сурах” (“Сурах сөздігіне қосымша”) – Шығыс Түркістан ғалымы Әбу-л-Фадл ибн әл-Қаршидің (лақап аты Жамал Қарши) 14 ғасырдың басында жазған тарихи-әдеби шығармасы.

Шығармада тек шайқылардың өмірін сипаттайтын күлдіргі әңгімелер және басқа бірде-бір жазба деректерде кездеспейтін тарихи мәліметтер көп. “Мулхақат әс-сурахтың” Қарахан әулеті жайлы тарауы өте құнды. Онда бұл әулеттің Қашғар тармағының генеалогиясы мен Алмалықта 13 ғ-да билік еткен түрік әулеті туралы егжей-тегжейлі жазылған. Моңғол хандары мен олардың серіктері жайлы қызықты деректер бар. “Жете” (кейбір тарихшылар 15 – 16 ғ-ларда Моғолстан халқын осылай атаған) термині алғаш рет осы шығармада кездеседі. “Мулхақат әс-сурахтың” екі кітабы (толық емес) Ресей Ұлттық ғылым академиясының Шығыстану институты Санкт-Петербург бөлімшесінің қолжазба қорында сақтаулы.