Мәдин Рахымжан

Мәдин Рахымжан (1873, Қарағанды облысы қазіргі Нұра ауданы Қылыш ауылы – 1931, Қорғалжын ауданы Тақта ауылы, қазіргі Баршын ауылы маңы) – Ақмола уезі аумағында 1916 жылы ұлт-азаттық көтерілісті ұйымдастырушылардың бірі, көтерілісшілер отрядының басшысы. Мәдин 15 жасынан жергілікті байдың жалшысы болған. Николай ІІ патшаның 1916 жылы Жарлығы бойынша кедейлерді тылдағы жұмыстарға жөнелту кезінде ауыл старшындары мен болыс басшыларының зорлық-зомбылықтарына қарсы күреске шықты. Мәдин жасағына (8 болыстың өкілдері) шілденің аяғында 12 мың, тамызда 15 мың, қыркүйекте 30 мың қол жиналды. Көтерлісшілер қаруланған әскерлерден өздерінен тартып алынған аттарын алып, заңды иелеріне қайтарып отырды; әскерге шақырылғандардың тізімін жойды. Пілте мылтықтар, айбалта, қолдан істелген құралдар, көбіне таяқ, сойылдармен қаруланған отряд патша армиясына төтеп бере алмады. Әшекей-Мөнек деген жердегі Көн өзені бойында болған соғыста күштері тең емес болғандықтан, отряд жеңіліске ұшырады. Мәдин Торғайға келіп, А.Имановтың сарбаздарына қосылды. Алайда, кепілге алынып, Ақмола түрмесіне қамалған көтерілісшілерді құтқару үшін қайтып келуге және билік өкілдеріне берілуге мәжбүр болды. Түрмеде қинауға түсті. Ақмолада Кеңес үкіметі орнағаннан кейін босатылды.

Дереккөздер

«Ақмола облысы» энциклопедиясы