Наксос

Наксос (Naxos) Грекиядағы КИКЛАД архипелагының ең ірі аралы. Халқының саны 14 838 адам (1991), айналасының ұзындығы 35 км, ені 26 км, ауданы 420 шаршы км. Бірдей аталатын астанасы мен бас айлағы аралдың батыс жағалауында ежелде және ортағасырларда астанасы болып келген орынға орналасқан. Ежелден Наксос шарап өндіруімен, Дионис ғибадатымен танымал болды. Б.д.д 7-6 ғасырларда мүсін жасайтын ақ түсті мәрмәр шығарылды. Б.д.д 490 жылы Парсылықтар, б.д.д 471 жылы афиналықтар жаулап алды. 1207-1566 жылдары Наксосты Венеция герцогтері, одан соң түріктер биледі. 1830 жылы Грекия корольдігіне қосылды. Бұл жерден Микендер қонысының қираған үйінділері табылды. Аралда ақ шарап, цитрус тұқымдасты жемістер өндіріледі, зімпара шығарылады.