Науқан

Науқан (Кампания; француз тілінде саmpagne, ағылшын тілінде campaign — жорық, итальян тілінде compagna — шайқас алаңы) — құрлық және мұхит соғыс театрларындағы ортақ ниетпен біріккен және маңызды әскери-саяси мақсаттарға жетуге бағытталған бірнеше стратегиялык операциялар мен басқа да әскери қимылдар. Соғыстың белгілі бір кезеңін білдіреді, әдетте күнтізбелік өлшемдермен (жылмен, жыл мезгілдерімен және т.б.) және әскери қимылдар театрымен белгіленеді. Науқан термині әскер тарихында бұрыннан белгілі. Ресейде бұл ұғым 18 ғасырдың басындағы ресми құжаттарда кездеседі. Науқанды жоспарлау Екінші дүниежүзілік соғыс кезінде ерекше сипат алды. Кеңес қарулы күштерінің Бас штабы әрбір науқанның жоспары мен түрлі ойын дайындап отырды. Соғыстан кейінгі кезеңде "науқан" ұғымы теориялық жағынан дамымай калды. Алайда Екінші дүниежүзілік соғыстың тәжірибесі мәнін жоғалтқан жоқ.