Незлобин театры - Москвадағы орыс драма театры. 1909 жылы антрепренер, режиссер әрі актер К.Н.Незлобин ұйымдастырды. Ол өз театрының репертуарына, режиссураға актерлік ансамбль мен спектакльдер декорациясына ерекше ден қойды. Россияда алғаш рет осы театрдың сахнасында И.В.Гётенің "Фауст" трагедиясының 1-бөлімі жарық көрді. Бұдан кейін Ж.Б.Мольердің "Ақсүйектер арасындағы тоғышар", М.Горькийдің "Васса Железнова" мен "Жауыздар", А.Н.Островскийдің "Ыстық жүрек" сияқты пьесалары қойылды. Бірақ театрдың бір тұтас көркемдік бағыты болмауынан оның репертуарынан талғамы төмен көрермендерге арналған пьесалар да (Дымовтың "Ню" және Арцыбашевтың "Қызғанышы" т.б.) орын алды. Театр 1920 жылға дейін жұмыс істеді. ==Қазақ Совет энциклопедиясының бас редакциясы, 8-ші том.1976==
