Николай Гаврилович Славянов

Николай Гаврилович Славянов (1854 жыл 23 сәуір, Липецк облысы, қазіргі Задонск ауданы, Никольское селосы - 1897 жыл 5 қазан, Пермь) - орыс өнертапқышы, металды электр доғасымен пісіру тәсілінің негізін салушылардың бірі.

Еңбек жолы

1877 жылы Петербург Тау–кен институтын бітіріп, Пермьде Воткин және Омутин зауыттарында, ал 1883 жылдан Мотовилихадағы Пермь зеңбірек зауытында жұмыс істеді. Славянов тұңғыш рет электр тогын өнеркәсіптік қыздыру мақсаты үшін қолданды және Н.Н.Бенардос ойлап тапқан электр доғасымен пісіру әдісін онан әрі жетілдірді. 1888 жылы металды электрмен құю әдісін, яғни бұйымды алдын ала қыздырып барып металл электродпен пісіруді ойлап тапты. Бұл табысы үшін 1890–1891 жылдары ол [[[Германия]]да, Францияда, Ұлыбританияда, Бельгияда, Австро–Венгрияда патент алды. Славянов еңбектерінде электр доғасымен пісірудің металлургиялық негіздері қаланды. Пісіру нүктелерін электр тогымен қоректендіру мақсатында ол алғаш рет электр генераторын, ал процесті механикаландыру әрі автоматтандыру үшін доғалы – автомат реттеуішті қолданды. Металл құрылымын жақсарту мақсатында «металл құймаларды электрлік нығыздау» тәсілін ұсынды. Славянов 1892 жылы Орыс техника қоғамының, ал 1893 жылы Чикагодағы Дүние жүзілік көрменің медальімен және құрмет дипломымен марапатталды.