Николай Иванович Рипинский

Николай Иванович Рипинский (22.5.1906, Мәскеу қаласы - 5.2.1968, Алматы) - архитектор. 1931 ж. Киев архитектура-құрылыс институтын бітірді. 1950 - 53 ж. Өскемен қаласындағы жобалау ұйымдарында, 1954 - 68 ж. Алматы қаласындағы Қазақ қала құрылыс жобалау институтында бас архитектор болып істеді. Өскемен қаласындағы түрғын үйлердің, Шығыс Қазақстан облысының атқару комитетінің, банк және байланыс жүйесінің жобасы мен облыс ауқымындағы бірнеше кенттердің бас жоспарын жасауға қатысты. Рипинский - Алматы қаласының орталық аудандарындағы жер сілкінісіне төзімді 4 - 5 қабатты түрғын үйлердің (1957), "Мир" және "Спутник" кинотеатрларының, Қазақ балалар мен жасөспірімдер театрының, "Алматы" қонақ үйі жобасының авторы; қаладағы Достық даңғылын қайта қүру жобасын жасаушылардың бірі. Басқа авторлармен бірге ол 1971 ж. Республика сарайының жобасы үшін КСРО Мемлекеттік сыйлығын алды. "Қүрмет белгісі"орденімен және медальдармен марапатталған.