Новгород көтерілісі — 1650 ж. мартта болған қала кедейлері мен қолөнершілерінің көтерілісі, 17 ғ-дың орта шеніндегі қала көтерілістерінің бірі. Көтерілістің шығуына астықтың сатып алу бағасының қымбаттауы себеп болды. Көтерілісшілер воевода Ф.И.Хилковты өкімет басынан қуды,В.Никифоров, М.Вязьма, Н.Тетерин сияқты "игі жақсылардың" сарайларын қиратты.Земство бастығын сайлап,қаланы басқаруға митрополит приказчигі И.Жегловты қойды. 17 мартта Новгород митрополиті Никон қаланың жаңа басшыларына қарғыс айтып, қарсы шыққаны үшін халық оны таяққа жықты. Патша Алексей Михайловичтің Новгородқа жіберген дворяны Соловцов тұтқындалып бірнеше күн қамауда болды. Көтерілісшілердің Псков бүлікшілерімен байланыс жасау әрекеті сәтсіз аяқталды. Князь И.Н.Хованскийдің әскері бірнеше күн Новгородты қоршап, 13 апрельде қалаға қарсылықсыз кірді. Көтеріліс басшылары тұтқындалды,олардың бесеуі өлім жазасына кесілді,жүзден астамы солтүстікке, Астрахань мен Терекке жер аударылды. ==Қазақ Совет энциклопедиясының бас редакциясы, 8-ші том.1976==
