Нысана координаттары

Нысана координаттары (Координаты цели) — координаттар жүйесіне сәйкес жер үстіндегі немесе кеңістіктегі нысаналардың жайын анықтайтын бұрыштық немесе сызықтық сандық өлшемдер. Нысана координаттары жер үстіндегі, су үстіндегі, әуедегі және басқа да нысаналарға соққы беру және оны дайындау үшін қажет. Жер үстіндегі және су үстіндегі нысаналар координаттардың тік бұрышты, географиялық, полярлық және биполярлық жүйесінде, әуедегі нысаналар географиялық, тік бұрышты, сфералық, параметрлік жүйелерінде анықталады. Ен көп тарағаны, әсіресе картамен жұмыста тік бұрышты координат жүйесі болып табылады. Тік бұрышты нысана координаттары сызықтық өлшемдермен анықталып (км және м), қысқартылып немесе толық беріледі. Нысана координаттарының бұрыштық өлшемдері градуспен, минутпен, секундпен бұрыш өлшегіш бөліктерімен, румбтармен беріледі. Нысана координаттарын анықтаудың тәсілдері мен құралдары нысана сипатына, талап етілетін координат дәлдігіне және қалыптасқан жагдайға байланысты тандалады. Мысалы, құрлықтағы әскерлерде нысана координаттары алыстан өлшейтін құралдардың, радиолокациялық станциялардың, дыбыспен барлау аспаптарының, бірлескен бақылаудың (2-3 бақылау пункттерінен) көмегімен аэросуреттер немесе карта бойынша, басқа да амалдармен анықталады.