Нұргүл

«Нұргүл» -ән-би ансамблі. 1971 жылы М. Мәметова атындағы педагогикалық училище жанынан алғаш «Қарлығаш» деген атпен құрылып, кейіннен «НҰРГҮЛ» ансамблі деп аталды.

Ансамбльдің алғашқы жетекшісі К.Әлиев болды. 1975 жылы өнер ұжымына «Халық ән-би ансамблі» атағы берілді. Ансамбль құрамында М. Д. Цой, Г. П. Першин, Ли Чер Сон, Ж. Өтемісова, Қ. Имашев, Ж. Келгенбаева, т.б. өнер көрсетті. 1976 жылы өнер ұжымы Германияның 16 қаласында концерттік бағдарламамен болып, қазақ өнерін неміс халқына паш етті. 1978 жылы Мәскеу қаласында «Көгілдір от» бағдарламасына қатысып, бүкіл КСРО халқының алдында өнер көрсетті. 1987 жылы Бүкілодақтық халық шығармалары ІІ фестивалінде І дәрежелі дипломмен марапатталған. 1989 жылы Петропавлда өткен би мерекесіне қатысты. Ансамбль Моңғол халық республикасында болып «Мәншүк ерлігі – мәңгілік» және «Ақ-босаға» деп аталатын әдеби-көркем, музыкалық композиция қойылымдарын орындады. 1995 жылы Абай әндеріне би, Н. Тілендиевтің «Аңсау» әніне композиция, Шығыс сазына сай «Шолпы», «Қызыл алма», т.б. билерді сахнаға шығарды.