Нұсқабайұлы Жарылқасын

Нұсқабайұлы Жарылқасын —1940 жылы 8 қаңтарда Түркістан облысы, Отырар ауданының Маяқұм мекенінде дүниеге келген..1965 жылы Әл-Фараби атындағы Қазақ ұлттық университетінің филология факультетін бітірген. Еңбек жолын теледидарда бастап, бас редакторлыққа дейін көтерілді. Қазақ телеграф агенттігінде аудармашы-редактор, "Жалын" баспасында бөлім меңгерушісі, "Мектеп" баспасында (кейінірек "Рауан") 1982 жылдан бас редактор, директор қызметтерін атқарды.

1998 жылдан "Білім" баспасының директоры. 1983 жылдан бері университеттің журналистика факультетінде үздіксіз сабақ беріп келеді.

Отырар ауданының Құрметті азаматы, профессор. "Баспа және полиграфия" ісінің қайраткері. ҚР Білім беру ісінің үздігі. Жазушы дербес кітап болып басылған "Құмда өскен қызғалдақ", "Мен күтпеген күн еді" повестерінің, "Аңқау арыстан", "Жылауық", "Түлкі мен балық", "Түлкі неге айлакер болды?", "Түйенің мүйізі қайда?", "Мақтаншақ бақа" сияқты кітапшалардың, "Инабат", "Әдеп", "Қазақ журналистикасының тарихы", "Kөне басылымдар, аяулы есімдер", "Алты алаштың ардақтылары" тәрізді ғылыми-педагогикалық еңбектердің авторы. Орта мектептің 10 сыныптарына арналған "Әдептану" оқулығының, "Әмбебап әліппе" оқулығы авторларының бірі. Чех жазушысының "Құтты аяғым Йонаш" повесін, "Батыр Пионерлер" атты деректі повестер жинағын, Х.Андерсеннің "Ертегілер жинағын", "Словак халық ертегілері" жинағын, "Сібір халықтарының ертегілерін", Ш.Әлімбаевтың "Даналық субстанциясы" романын, Е.Кобалевтің ЖЗЛ сериясымен шықкан "Хо Ши Мин" ғұмырнамасын, "Шаңқай түсте көлеңкелер қалмайды" ("Тени исчезают в полдень") деп аталатын 7 сериялы көркем фильмді, "Аласұртқан ақша" көркем фильмін, түркімен жазушылары Х.Халлыевтің "Жол", Ш.Чарыевтың "Саз сырнайшы", белорус жазушысы В.Горбуктың "Көгілдір шырша", Я.Бегнаскаяның "Біз Павлик екеуміз қалай Робинзон болдық" сияқты шығармаларын, қырғыз, тәжік, орыс, армян жазушыларының да бірсыпыра әңгіме, повестерін аударды.