Отырар ауданының әкімдігі

Отырар ауданы әкімінің аппараты - басқару мекемесі.

Жаңадан құрылған президенттік басқару мен ҚР атқару билігінің өкілі ретінде 1992 жылы құрылып, атқару комитетін алмастырды. Әкімшілік салалық басқаруды ретке келтіре отырып, ауылдық әкімшіліктер мен жергілікті өзін-өзі басқару органдарын тұрақтандырды, басқарудың төменгі буындары мен аудан әкімдігі аппаратының өзара қатынастық тетіктерін, жүйелік тәртіптерін белгіледі. 1993—97 жылы күрт құлдырап кеткен аудан экономикасын қайта түзеу бағытында көптеген істер атқарған. Бірінші кезекте мемлекеттік Заңдар мен Үкіметтің қаулы-қарарларын орындау, орындаушылық тәртіпті нығайту, бұқара халықпен қарым-қатынасты нығайтып, олардың алдында атқарылған жұмыстар бойынша есеп беріп отыру жұмыстары жолға қойылған. ҚР 1993 жылы 9 желтоқсандағы "Жергілікті кеңестердің өкілеттігін шұғыл тоқтату туралы" Заңына сәйкес Отырар ауданының ауылдық кеңестері өз қызметін тоқтатты.

1994 жылы 5 қаңтарда Түркістан облысы әкімінің қаулысымен өзіне бірнеше елді мекендерді қамтитын ауылдық кеңестердің шекараларында Ақтөбе, Балтакөл, Қарақоңыр, Көксарай, Маяқұм, Отырар, Талапты, Темір, Қожатоғай, Шәуілдір, Шілік ауылдық округтері құрылды.

2001 жылы 1 қаңтардағы мәлімет бойынша ауданның құрамына елді мекендерімен қоса алғанда төмендегі ауылдық округтер кірді: Ақтөбе ауылдық округі: Аққұм, Аманбай, Жосалы, Орынбай ауылдары; Қарақоңыр ауылдық округі: Ақтөбе, Арыс, Бестораңғыл, А.Жармұхамедов, Қарақоңыр, Қарақоңыр станциясы, Қостүйін, Сырдария ауылдары; Көксарай ауылдық округі: Жанкел, Көксарай, Шеңгелді, Ызакөл ауылдары; Қожатоғай ауылдық округі: Байтоғай, Бұлақ, Дарбаза, Қожатоғай ауылдары; Маяқұм ауылдық округі: Аққұм, Бестам, Босаға, Ешкіқора, Қостерек, Маяқұм ауылдары; Отырар ауылдық округі: Арыс, М.Шойманов, Қарғалы, Отырар ауылдары; Талапты ауылдық округі: Қөкмардан, Қоғам, Мыңшұңқыр, Сарыкөл, Талапты, Ынталы ауылдары; Темір ауылдық округі: Ақшоқат, Есқара, Темір, 37-разъезд 4 (отыз жетінші жол айырмасы), Ұзынқұдық, Отырабад ауылдары; Шәуілдір ауылдық округі: Шәуілдір аулы; Шілік ауылдық округі: Ақдала, Ескі Шілік, Шілік ауылдары.

Аудан әкімі аппараттық кеңесінде барлық ауыл әкімдері, бөлім басшыларының қатысуымен аудан әкімі аппаратына келіп түскен құжаттар мен арыз-шағымдардың орындалуына талдау жасайды. Әр айдың екінші сәрсенбісінде аудан әкімі азаматтарды жеке мәселелері бойынша "Тікелей сымтетік" арқылы қабылдайды. Отырар ауданы әкімдігінің құрылымында аудан әкімінің бірнеше орынбасарлары маңызды рөл атқарады. Аудан әкімінің орынбасары — аудандық ауыл шаруашылығы және жер қатынастары бөлімі, аудандық қала құрылысы және құрылыс бөлімі, аудандық тұрғын үй коммуналдық шаруашылық, жолаушылар көлігі және автомобиль жолдары бөлімдерінің жұмыстарын үйлестіреді. Аудан әкімінің орынбасары — аудандық білім беру және спорт бөлімі, аудандық мәдениет және тілдерді дамыту бөлімі, аудандық ішкі саясат бөлімі, аудандық халықты жұмыспен қамту және әлеуметтік бағдарламалар бөлімі сынды басқару жүйелерінің қызметін қадағалайды. Аудан әкімі аппаратының басшысы — аппараттың аумақты дамыту және кадрмен жұмыс бөлімі, аудан әкімі аппаратының жалпы бөлімі, аудан әкімі аппаратының әкімшілік бөлімі, ауыл әкімі аппараттарының жұмысын үйлестіреді. Аудан әкімінің орынбасары — аудандық қаржы бөлімі, аудандық экономика және бюджеттік жоспарлау бөлімдерінің жұмысын үйлестіреді.