Палестиналық арабтар

ПАЛЕСТИНАЛЫҚ АРАБТАР – ұлттық Палестина аймағының байырғы және негізгі халқы. Жалпы саны 5 млн. адам (2004). Иордания (2 млн. адам) мен Израильде (1 млн. адам) көп шоғырланған. Сондай-ақ Кувейт, Сирия, Ирак, Катар, Ливан, т.б. елдерде тұрады. Антропология жағынан үлкен еуропалық нәсілдің үнді-жерортатеңіздік тобына жатады. Араб тілінде (сиро-палестин диалектісінде) сөйлейді. Басым бөлігі ислам дінінің сүннит тармағын ұстанады. Этникалық тарихы Палестина аймағындағы байырғы халықтармен тығыз байланысты (қ. Арабтар). Израиль тарапынан көрсетілген ұзақ жылдар бойғы қысым Палестиналық арабтардың ұлт ретінде топтасуында шешуші рөл атқарды. Көшпелі, жартылай көшпелі мал шаруашылығымен айналысатын Израильдегі Палестина арабтар (10%) Негев шөлінде ғұмыр кешеді. Қой мен ешкі, түйе өсіреді. Отырықшылары дәнді дақылдар, бау-бақша, көкөніс егеді. Отырықшы халық саз балшықтан салынған (төбесі тегіс етіп жабылған) бір қабатты баспаналарда, көшпелілері шетен шатырларда өмір сүреді. Киімдері, тағамдары өзге арабтарға ұқсас. Бай ауыз әдебиеті сақталған.[1]

ДереккөздерӨңдеу

  1. Қазақ Энциклопедиясы”, V-том