Пар — күздік, жаздық дәнді дақылдар үшін даярланатын, ауыспалы егіс танабы. Пар арам шөптен таза болуы, топырақтағы ылғал, қоректік заттар қорын көбейту үшін жаз бойы бірнеше рет өңделеді. Пардың бірнеше түрі бар. Таза қара Пар күзде жыртылған жер көктемде көң шашып қайта өңделеді, тырмалап қопсытылады, культиваторланады. Таза қара Пар қуаңшылық аймақтарда тиімді. Бүкіл одақтық астық шаруашылығы ғыл.- зерт. институтының (Шортандыдағы) зерттеулеріне қарағанда Қазақстанның тың өлкесінде таза Пар жаздық бидайдың бір гектардан алынатын өнімін 5 ц-те арттырады. Ерте Пар егістікті көктемде жыртып өңдейді. Ықтырмалы Пар — ылғалы тапшы аймақтарда егістікке қар тоқтату, топырақты жел эрозиясынан және күздікті суықтан сақтау үшін Парға қатарлап сабағы ұзын өсімдіктер (күнбағыс, жүгері т. б.) егеді. Ықтырмалы Пардан кейін бидай өнімі га-сына 2—3 ц артады. 1974 ж. Павлодар облысыңда ықтырмалы Пардан кейін 207 мың га-ға астық егілді. Ылғалы жеткілікті аймақтарда егістікті үдемелі пайдалану үшін таза пардың орнына екпе Пар қолданылады. Бұл жерге ерте пісетін дақыл егіледі де, ол орылған соң келесі дақылға қолайлы су, қорек жағдайын туғызу үшін топырақ Пар ретінде өңделеді. Жасыл Пар — топырақты тыңайтудың бір түрі. Мұнда жерге бөрі бұршақ тұқымдас егіп, оны көктеген топыраққа араластырып жыртады.Мұндай топырақта қоректік заттар молаяды.

Дереккөздер өңдеу

[1]

  1. Қазақ Совет Энциклопедиясы, 9 том