Пиелография

Пиелография (гр. pyelos - бүйрек қуысы және графия) — бүйректі рентген арқылы тексерудің бір әдісі. Мұнда бүйрек қуысына және оның үлкен, кіші тостағаншаларына контрасты сұйық зат жіберіп рентгенография жасайды. Несеп органдарының ішкі жағы (тостағаншалар, бүйрек қуысы, несеп жолы, қуық) әдетте рентген суретінде көлеңке қалдырмайды. Сондықтан 19 ғ-дың бас кезінде неміс ғалымдары Фелькер мен Лихтенберг бүйрек пен несеп жолына катетер арқылы 5 пайыздық колларгол ерітіндісін құйып, содан кейін рентгенге түсірген. Сол жылдары бүйрек қуысына оттек толтырып, пневмопиелография жасау әдісі ұсынылды. Контрасты заттарды вена қан тамырына жіберіп, оның бүйрек арқылы бөлінуін анықтау әдісін "урография" деп атайды. Бұл әдіс клиника жағдайында жиі қолданылады. Контрасты заттар ретінде көбіне организмге зиянсыз және рентген суретінде жақсы көрінетін иод препараттары қолданылады.