РК(б)П Орталық комитетінің (Қазақ) Қырғыз бюросы

РК(б)П Орталық комитетінің (Қазақ) Қырғыз бюросы (Кирбюро) — Қазақстандағы коммунистік партияның қызметін жандандыру мақсатында ұйымдастырылған РК(б)П ОК-нің өкілетті органы.

РК(б)П ОК хатшылығының 1922 жылы 5 сәуірдегі қаулысымен құрылды. Оның құрамына В.Г. Юдовский, А.И. Вайнштейн, С.Меңдешев енді (кейін Г.А. Коростелев, В.И. Вельман кірді). РК(б)П Қазақ обкомы мен РК(б)П ОК-нің Қазақ бюросы қатар жұмыс істегенімен, бүкіл саяси, билік Қазақ бюросының қолында болды. Қазақ бюросы большевизмнің Қазақстандағы әлеуметтік тірегі ретінде қазақ кедейлерін коммунистік партияға көптеп тартты. Ол жергілікті партия ұйымдары мен к-ттеріне идеологиялық тұрғыдан жетекшілік етіп, “қазақ ұлтшылдығымен” күрес қарқынын күшейтті. Кеңес, кәсіподақ, комсомол, т.б. мемлекеттік және қоғамдық ұйымдардың қызметін реттеді, жаңа экономикалық саясаттың енгізілуіне, халық шаруашылығын қалпына келтіруге басшылық жасады. Қазақ бюросы 1924 жылы қазан айында таратылды.