Ракөш (ауыл)

Ракөш — Атырау облысы, Мақат ауданы құрамында болған ауыл.

XIX ғасырдың I жартысында Жем өзенінің Каспий теңізіне құяр сағасында бой көтерген балықшылар кенті. XX ғасырдың басында Ембі мұнайын иемденген “Эмба” және "Жайық-Каспий” қоғамдары осы маңайға мұнай айыру зауыттарын тұрғызған. Сонымен бірге мұнай сақталатын қазандар орнатып, оларды Доссордан тартылған құбырлар арқылы толтырып отырған. Пристаньға келген кемелерге құйып, мұнай мен мұнай өнімдерін Астраханға, одан әрі орталыққа жөнелткен. Өндіріс өркендеп, жұмысшылар санының көбеюі елді мекеннің ұлғаюына септігін тигізді. Бірнеше шағын аудандар пайда болды. Бастауыш мектеп, фельдшерлік пункт, шіркеу, т.б. тұрғызылды.

XX ғасырдың 30-жылдарына дейін кент Ракөш болысының орталығы болып есептелген. Оған 7 ауылдық Кеңес қараған. Халқының саны - 5334 адам. Темір жол тартылып, Каспий-Орск мұнай құбыры төселгеннен кейін мұнайды теңіз арқылы тасымалдау тоқтатылды. Осыған байланысты тұрғындар жұмыс орны бар мекендерге қоныс аударып кетті. Бүгінде теңіз суы шайған орны ғана бар.