Рейш Бруно Эрихович

Рейш Бруно Эрихович (1927-1992), ҚазКСР-ң Еңбек сіңірген дәрігері, денсаулық сақтау саласының үздігі.

1927 жылы Ростов-на-Дону қаласында, дәрігер отбасында дүниеге келген. 1950 жылы Алматы медициналық институтын үздік аяқтайды. Талдықорған облыстық денсаулық сақтау бөлімінде бас хирург болып қызмет атқарады.

1962 жылдан бастап оның қызметі Шығыс Қазақстан облысымен байланысты болды: Лениногор полиметалл комбинаты медицина-санитарлық бөлімінің хирургия саласының меңгерушісі, 1962 ж. желтоқсан айынан - облыстағы бас хирург және облыстық аурухананың хирургия бөлімінің меңгерушісі болған. Шығыс Қазақстанда алғаш рет жүрекке оталау жасауды тәжірибеден өткізіп, жүздеген адамды құтқарып қалған.


Бруно Эрихович өмірінің соңына дейін адал қызмет еткен. Мыңдаған шығысқазақстандықтар ол кісіні зор ілтипатпен еске алады.


Бруно Эрихович Шығыс Қазақстан хирургиясының құрылуы мен дамуына барынша үлес қосқан азамат. Ол көптеген жас дәрігер тәрбиелеп, өз тәжірибесін жетік меңгерте білген. Өскемен қаласы мен облыс көлемінде Б.Э.Рейштің қоғамдық-саяси қызметі кеңінен танылған. Ол КСРО халық депутатына сайланған, өңірдің нақты экологиялық мәселелерін, облыстық диагностикалық орталық құрылысын шешуге барынша ат салысып, тұрғындар арасында ағартушылық жұмысты ұйымдастырушы болған.

Марапаттары: "Ленин", "Еңбек Қызыл Ту" ордендері, медальдар. 30 жыл (1961-1992) бойы ерен еңбек еткен ШҚ облыстық ауруханасы ғимаратына дәрігер құрметіне мемориалды тақта орнатылған.

Дереккөздер өңдеу

Сыртқы сілтемелер өңдеу