Саид хан

Саид хан - Моғолстан билеушісі (1514 - 1533 жылдары), Жүніс ханның немересі, Ахмет ханның ұлы. Мұхаммед Хаудар Дулаттың "Тарих-и Рашиди" атты еңбегінде Қасым хан мен Саид сұлтанның 1513 жылғы кездесуі баяндалады. 1514 жылы Саид хан Жетісу, Тянь-Шань, Ташкенттегі иеліктерінен айырылғаннан соң Әбубәкір Дулаттың әскерін талқандап, Қашқарды тартып алып, Шығыс Түркістанда жаңа Моғолия мемлекетін құрады. 1522 - 1523 жылы Саид хан бұрынғы Моғолстан жеріндегі Шағатай әулетінің иелігін өзіне қайтару мақсатымен баласы Рәшидті Жетісуға жібереді. Бірақ қазақтар мен қырғыздардың табанды қарсылығына тап болған ол Қашқарияға қайта оралады. Өкімет басына талпынған Рәшид әкесі Саид ханды 1533 жылы Тибетке жорыққа аттандырады, хан сонда қайтыс болады.