Суқалампыр

Суқалампыр-тарандар тұқымдастығына жататын, биіктігі 30-60 сантиметр, ұзын жапырақтарының ұшы сүйір, сабағы тік өсетін, жасыл немесе ашық қызыл түсті ұсақ гүлдері бар бір жылдық өсімдік. Жемісі-үш қырлы дән.

Ордабасы ауданы жағдайында өзен жағаларында, шабындықтарында өседі, шілде-тамызда гүлдейді. Шөбінде қан айналымын жақсартатын глюкозид, эфир майы, органикалық қышқылдар, рамназин, кверцитрин, витаминдер, аса көп мөлшерде илік заттар бар.

Халық емшілері оның гүлдеген кезде жиналған шөбінен жасалған тұнбамен қан тоқтатады, ауруды басады, жүйкені тыныштандырады, қабынулардың алдын алады.

Суқалампырмен ертеректе безгекті де емдеген. Ғылыми медицина аталмыш өсімдік шөбінің сұйық сығындысын гинекологиялық ауруларды емдеуге пайдаланады.