Сүйел

Сүйел - тері қабатына шығатын, көбінесе жұқпалы болып келетін мүйізді қабықтармен жабдықталған эпидермалық қатерсіз өскіндер. Олар адамның папилломатоздық вирусының кейбір түрлерінен таралады.

Шар пішінді сүйел

Түрлері және сипаттары

Сүйелдің кәдімгі, жалпақ, үшкір және кәріліктен болатын түрлері бар:

• кәдімгі сүйелдің кішкенесі түйреуіш басындай, ірісі бұршақ дәніндей, ал пішіні жартылай шар тәрізді немесе сопақша болады. Ол қолдың сыртына, саусаққа, табанға шығады. Тырнақ маңайына және табанға шыққан сүйелдер жанға батуы мүмкін.
• жалпақ сүйелдер дөңгелек немесе үшкір пішінді түйіншек сияқты болады. Бұл көбінесе бетке және қолдың сыртына шығады. Ол жұқпалы болады. Жалпақ сүйелдер кейде бірнеше айдан соң өздігінен жоғалып кетеді.
• ұдайы тітіркеніске ұшыраған тері үстінде үшкір сүйел пайда болады: кейде ол өршіп, пішіні тауықтың айдары немесе түсті мыңжапырақтың басы секілді бұжырланып кетеді.

Бұл сүйелдерді сүзілгіш вирустар қоздырады, ол тікелей ауырған адамнан және үйдегі заттардан жұғады.

• кәрілік сүйелі егде тартқан адамдарға шығады. Ол дөңгелек, сопақша немесе бұрыс пішінді, ал көлемі жағынан жасымық дәніндей болады. Көбінесе кеудеге, арқаға, бетке шығады; түсі - сұрғылт сары немесе қызыл қоңыр келеді.

Кейде теріге сыртқы түрі кәрілік сүйеліне ұқсас кератома деп аталатын өсік шығады. Әр түрлі тітіркендіргіштердің (физикалық, механикалық, химиялық) әсері салдарынан қатерлі ісікке айналуы мүмкін. Сондықтан теріде мұндай өсіктер пайда болғанда дереу дәрігерге қаралған жөн.

Сақтық шаралары

• қолды жиі жуу;
• дербес сүлгіні пайдалану;
• ұстараны, қайшыны ыстық сумен жақсылап жуу;
• тырнақ тазалайтын щетканы таза ұстау;
• біреудің шұлығын, қолбағын және т.б. киімдерін кимеу.

Емдеу жолдары

• дәрі-дәрмекпен емдеу;
  • химиотерапия
  • иммунотерапия
• хирургиялық жолмен емдеу;
• халықтық медицина жолымен емдеу;
  • өсімдіктер шырыны
  • әр түрлі шөптердің жапырақтары мен тұнбалары

Сүйелді (әсіресе балаларға шыққанын) үйде емдеуге болмайды. Теріге шыққан ұсақ сүйелдерді азот қышқылымен күйдіреді. Сүйел пайда болғанда дәрігерге қаралған дұрыс.

Тағы қараңыз

• Меланома