Сүлейман Демирел атындағы университет

Сулеймен Демирел атындағы Университет, СДУ (ағылш. Suleyman Demirel University, SDU, орыс. Университет имени Сулеймана Демиреля) — Қазақстан Республикасындағы жоғарғы оқу орны. Университетті 1996 жылы 17 желтоқсан күні Қазақстан Республикасының Президенті Н.Ә.Назарбаев пен Түркия мемлекетінің Президенті Сүлеймен Демирел ашты.

Сулейман Демирел атындағы университет
Ұраны:
Арманыңа анық бас
Университет атауы
Шынайы аты	Сулейман Демирел атындағы университет
Халықаралық атауы	Suleyman Demirel University
Жалпы сипаттамасы
Құрылған жылы	17 желтоқсан 1996 жыл
Түрі	Университет
Орналасуы
Орналасқан жері	Қазақстан, Алматы облысы, Қаскелең қаласы
Мекенжайы	1/1, Абылай хан көшесі, Қаскелең
Кампус	қала сыртында
Әкімшілік
Президенті	Мейірбек Мажитов
Ректоры	Қуаныш Ерғалиев
Негізгі көрсеткіштер
Студенттер	7000-нан аса
Шетел студенттері	100-ден астам
Бакалавриат	21
Магистратура	7
Докторантура	5
Сайты	[1]

СДУ – оқу үдерісін халықаралық үлгідегі бағдарламаға сай жүргізетін оқу орны болып табылады. Университеттің негізгі мақсаты – қолжетімді бағалармен бакалавриат, магистратура, докторантура және біліктілікті жетілдіру бағдарламалары саласында сапалы білім беруді қамтамасыз ету. Университет бағдарламалары жеке тұлғалардың, қоғамдық топтар мен мекемелердің қажеттіліктерін қанағаттандыруға жауапты, сондай-ақ мемлекеттегі және әлемдегі әлеуметтік, саяси, экономикалық ортаға бейімделген.

Университеттің мақсаты – білім және ғылым саласында жеке және кәсіби шеберліктерін жетілдіру және арттыруды қалаушылар үшін бағдарламаларды үздіксіз дамыту және кеңейту болып саналады. Әрине, бұл мүмкіндікті әрбір студент әлеуметтік-экономикалық статусына қарамастан пайдалана алады. Сонымен бірге, студенттердің нәсіліне, ұлтына, мәдени әдет-ғұрпына қарамастан, олардың интеллектуалды потенциалы мен адамгершілігі біз үшін ең алғашқы орында.

Университет 2010-2011 оқу жылынан бастап өз жұмысын заманауи оқу-зерттеу құралдарымен жабдықталған «Smart Campus» қалашығында бастады. Бұл оқу кешені 7000-ға жуық студентті заманауи оқу орны және жатақханамен қамтамасыз ету үшін бой көтерген. Кампустағы 4 факультеттің дәрістері негізінен ағылшын және қазақ тілдерінде жүргізіледі. 17 гектар аумақта жайласқан жаңа оқу ғимараты өзінің 16 анфер лекция залы, 120 аудиториясы, 3 зерттеу орталығы, 8 компьютер бөлмесі, 2 интернет кафесі, 1 стадион, конференц-зал, медициналық пункт, заманауи оқу құралдары мен аса бай электронды ресурстармен жабдықталған 3 кітапханасымен білім алушыларға өте қолайлы жағдай жасайды.

Оған қоса, кампуста 2 асхана және 3 кантин бар. Ол жерлерде студенттер тамақтанумен шектеліп қана қоймай, бос уақыттарында бас қосып, студенттік өмірлеріндегі маңызды мәселелерін талқылауға, демалуға мүмкіндіктері мол. Қазіргі таңда кампустың жекелеген бөліктері салынып, жетілдіріліп жатыр.

Бағдарлама түрлері

Сүлейман Демирел атындағы университет, Сыртқы көрініс

СДУ-де әртүрлі деңгей және салада күндізгі бөлім бағдарламалары оқытылады. Қазіргі уақытта СДУ бакалавр деңгейінде 4 факультет бойынша бірнеше мамандықтарды ұсынады. Университет ғимараты әлі де құрылыс үстінде, кеңеюде. Бұл - болашақта тағы да басқа бағдарламалар қосылатындығын білдіреді. Магистратура бағдарламалары 7 түрлі салада ағылшын тілінде оқытылады. Бұл деңгейлер заманауи қоғам талабына толығымен жауап береді. Сонымен бірге, университетте PhD бағдарламалары бойынша да зерттеу жұмыстарын жүргізу мүмкіндіктері бар. Дамыған тіл мектебі кәсібилігін арттыру мақсатында ағылшын және түрік тілдерін үйренуді қалаушыларға әртүрлі деңгейдегі бағдарламаларын ұсынады. Жалпы айтқанда, Тіл мектебіне барлық қалаушылар қабылданады. IELTS және TOEFL тесттері бойынша да біліктілігі жоғары мұғалімдер көмектесе алады.

Факультеттер

Педагогика және гуманитарлық ғылымдары факультеті

Педагогика факультетінде «Қазақ тілі мен әдебиеті», «Шетел филологиясы», «Шет тілі: екі шет тілі», «Аударма ісі», «Химия-Биология», «Физика-Информатика» және «Математика» мамандықтары бойынша білім беріледі. Педагогика және гуманитарлық факультеті ұжымының басты мақсаты - терең білімі бар, кәсіптік деңгейі жоғары бүгінгі күннің біліктілік талабына сай педагог мамандар дайындау. Факультет түлектері алыс–жақын шетелдерде тәжірибеден өтіп, Түркия, Қытай, Ұлыбритания, АҚШ мемлекеттерінің беделді университеттерінде ғылыми зерттеулермен айналысуда.

• 5B011700 Қазақ тілі және әдебиеті
• 5B011900 Шет тілі: екі шет тілі
• 5B020700 Аударма ісі
• 5В021000 Шетел филологиясы

СДУ Бизнес мектебі

Бизнес мектебі әлемде өзгеріп жатқан экономикалық және саяси мәселелерден үнемі хабардар және студенттерге өз білімдерін сол мәселелер бойынша тәжірибеде қолдануға бірегей мүмкіндіктер беруде. Факультет - бәсекелестікке қабілетті халықаралық үлгідегі жоғары деңгейде білім беру арқылы студенттерін өз қатарластарынан ажыралып тұруына себепші.

Факультет білім, ғылыми зерттеу, экономика және менеджмент ғылымында терең білім алу саласында заманауи үстемдік ретінде өсуде. Факультет түлектері – кәсіпкерлік, коммерциялық кәсіпорындарда, қаржылық, сақтандырушылық, банктік, басқарушылық және басқа да шетелдік компанияларда, өкілеттіктерде, бірлескен кәсіпорындарда, әлеуметтік–экономикалық, ұйымдастырушылық – технологиялық, ғылыми – зерттеушілік және инновациялық қызмет түрлерімен айналысатын сан салалы мамандар.

• 5B050600 Экономика
• 5B050900 Қаржы
• 5B050700 Менеджмент
• 5B051100 Диджитал маркетинг
• 5В050800 Есеп және аудит

Құқық және әлеуметтік ғылымдар факультеті

Қоғамның барлық салаларында әрқашан қажеттілік тудыратын мамандықтың бірі – заңгер мамандығы. Құқық пен заңды білумен құқық әлемінде бағдарлану қабілеті өмірге кең көзқарас қалыптастырып, үлкен мүмкіндіктерге жол ашады.

Жалпы оқу бағдарламасы келешекте құқықтану бакалавры академиялық дәрежесін алған түлекті ҚР-ның құқық қорғау органдарында, заң шығару органында және сот жүйесінде, нотариат, адвокат мамандықтары бойынша ағылшын және түрік тілдерін терең меңгерген жаңа заман заңгерлерін даярлайды. Жоғарғы курстарда сабақ өткізу үшін Түркия мен Еуропа елдерінің беделді ЖОО профессорлары шақырылады.

Оқу процесі заңгерді болашақта заң мамандығын талап ететін кез-келген қызметте жұмыс істей алатын, сонымен қатар құқықтың белгілі бір саласында терең білімі бар, жан-жақты маман ретінде дайындау үшін ұйымдастырылған.

• 5B030100 Құқықтану
• 5В020300 Тарих
• 5B050400 Журналистика
• 5B020200 Халықаралық қатынастар

Инженерлік және жаратылыстану ғылымдары факультеті

Инженерлік факультет - университеттің бағдарлама жасау бойынша озық зертханасы бар, сапалы білім беру орталығы. Университет қабырғасында ақпараттық технологияларды программалық жабдықтауға арналған ғылыми зерттеу орталығы қызмет етеді. Факультет түлектері қазірдің өзінде Қазақстанға және шетелде танымал.

Факультетте халық шаруашылықтың, бизнестің әр алуан салаларында табысты жұмыс істей алатын математика, ақпараттық технологиялар және механика мамандықтары бойынша біліктілігі жоғары мамандарды даярлауда; студенттердің, магистранттар мен PhD докторанттардың оқуына, шығармашылықтарына арналған мүмкіншіліктерді беру, ойдың және жекелік өздігінен жетілуіне жайлы шарттарды жасауда.

Мемлекеттік органдарды, түрлі мекемелер мен компанияларды сапалы білімді мамандармен қажеттілігінше толық қамтамасыз ету мақсатымен, сондай-ақ студенттердің сапалы және қажетті білім алуын қанағаттандыру мақсатымен, қазіргі технологиялардың даму динамикасын қадағалайтын икемді бағдарламалар бойынша білім беру қызметтерінің ашық және айқын жүйесін құру; ғылыми, педагогикалық және нақты өндірістік қарым-қатынасты нығайту мақсатымен мемлекеттік ұйымдармен, мекемелермен ынтымақтастықты дамыту – факультеттің басты мақсаты.

• 5B010900 Математикалық педагогика (ағылшын тілінде)
• 5B060100 Ғылыми Математика (ағылшын тілінде)
• 5B070300 Ақпараттық жүйелер (ағылшын тілінде)
• 5B070400 Есептеу техникасы және бағдарламалық қамтамасыз ету (ағылшын тілінде)

Үздіксіз Білім Беру Орталығы

Үздіксіз білім беру концепциясын таратуға және жас мөлшері мен мамандыққа қарамастан жан-жақты дамытуға бағытталған орталық.

СДУ - үздік оқытушыларынан сапалы білім алуға мүмкіндік беретін, сіздің зияткерлік қабілетіңізді дамытатын әмбебап платформа. Орталықтың негізгі бағыты – әрбір заманауи адамға қажетті тілдік, сандық, сонымен қатар математикалық сауаттылықты арттыру. Біз ересектер мен жасөспірімдерге ең сапалы және қажетті білім береміз.

Тіл мектебі

Ағылшын тілі

• Жалпы ағылшын
• Академиялық ағылшын
• Іскерлік ағылшын
• Кәсіби ағылшын

Әлем тілдері

• Қазақ / Орыс / Түрік / Қытай / Корей / Француз / Неміс тілдері

Біліктілікті арттыру

• Педагогтарды дайындау (Тілдік біліктілікті жетілдіру)
• Оқу-әдістемелік семинарлары

Емтихандарға дайындық

• IELTS / TOEFL / SAT / GRE / GMAT

Математика мектебі

• Қаржы математикасы
• Мектеп математикасы
• Жоғарғы математика
• Емтихандарға дайындық (SAT, GRE, GMAT)

IT мектебі

• Олимпиадаға арналған бағдарламалау (ACM)
• Бағдарламалау негіздері (балаларға арналған бағдарламалау)
• Ойындар жасау
• Веб-сайт және платформа жасау
• Компьютерлік сауаттылық
• Графикалық дизайн (Видео өңдеу)
• 3D модельдеу / AutoCAD
• Andriod / IOS

Foundation

Талапкерлерге арналған 1 жылдық кешенді бағдарлама

• Ағылшын тілі
• Профориентация

Мектеп бағдарламалары

• Факультативтер
• Жобаға немесе олимпиадаға дайындау
• Бейімдеу лагері
• Логика

Қосымша

• Тілдік деңгейді анықтау
• Шетел тілі сөйлесу клубы
• Мәдени-спорттық іс-шаралар
• Зияткерлік іс-шаралар
• Белсенді демалыс
• Шешендік өнер

Магистратура және PhD бағдарламалары

Сулейман Демирел атындағы университет магистратура және PhD бағдарламаларын да ұсынады. Бұл бағдарламалар халықаралық бағдарламалар негізінде ағылшын тілінде оқытылады. Сабақ кестелері студенттің уақыт талабына қарай түзіледі. Өйткені СДУ оқу үдерісін әрдайым жаңартып, заманауи түрде жүргізуге тырысады.

Университетіміз жоғары оқу орнынан кейiнгi бiлiм беру бағдарламасы бойынша төмендегідей магистратура мамандықтарын даярлауды іске асыруда. Магистратурада мамандар дайындау екі бағытта жүргізіледі: ғылыми- педагогикалық бағыт және бейіндік бағыт.

• 6М011700 «Қазақ тілі және әдебиеті»
• 6М011900 «Шетел тілі: екі шетел тілі»
• 6М070400 «Есептеу техникасы және бағдарламалық қамтамасыз ету»
• 6М010900 «Математика» (Педагогика)
• 6М060100 «Ғылыми Математика»
• 6М050700 «Менеджмент»
• 6М050600 «Экономика»

Университетіміз PhD бағдарламасы бойынша төмендегі мамандықтар бойынша халықаралық талаптарға сай ғылыми мамандарды даярлауды іске асыруда:

• 6D070400 «Есептеу техникасы және бағдарламалық қамтамасыз ету»
• 6D010900 «Математика» (Педагогика)
• 6D050700 «Менеджмент»

Университет, Жүйелі әлеуметтік шаралар университеттегі студенттер өмірінің бір бөлігі

Қол жетімді бағалар

Университетте сапалы білім алу құны қол жетімді. Сонымен қатар СДУ-нің ішкі гранттары, білім алуға жеңілдіктер, университетте жұмыс және түлектердің жұмысқа орналасуына көмек ретінде қаржылай қолдау көрсетіледі.

Әлеуметтік орта

СДУ-де студенттердің өз мүмкіндіктерін академиялық, қоғамдық және әлеуметтік өмірде қалыптастыруға арналған, қызығушылықтарына байланысты әртүрлі клубтар мен үйірмелер жұмыс жасайды. Университеттің қоғамдық өміріне араласу студенттің көшбасшылық қабілеттерін дамытуға және топта бірігіп жұмыс істеуге мүмкіндік береді.

Жұмысқа орналасу мүмкіндіктері

Сулейман Демирел атындағы университет Қазақстандағы сапалы білім беретін университеттердің бірі. Университет түлектеріне жергілікті компаниялармен қатар халықаралық компаниялар да қызығушылық танытуда. Түлектердің 95%-ы университетті бітіргеннен соң жұмыспен қамтамасыз етілуі соның айғағы. Университет сапалы кәсіби мамандарды жетілдіріп шығаруда өз күшін салуда.

Халықаралық қатынастар

Университетаралық ынтымақтастықтың бірден-бір басты бағыты - білім алушыларға шетелдік жоғары оқу орындарында іс-тәжірибесін өтеуге мүмкіндік беруге және екі диплом алуға бағытталған бірлескен білім бағдарламаларын әзірлеуге және жүзеге асыруға барынша көмек көрсету болып табылады.

Университеттің халықаралық қатынастар бөлімінің қызметі - әлемдік білім беру және ғылыми қауымдастыққа ары қарай ықпалдастыру, университеттің имиджін нығайту жөніндегі міндеттерді шешуге бағытталған. Бұл жұмыс шетелдің жетекші университеттерімен ынтымақтастық бағдарламалары шеңберінде, халықаралық білім бағдарламалары мен жобаларды жүзеге асыру, бірлескен ғылыми-зерттеу қызметтерін жүзеге асыру, ғылыми-практикалық семинарлар мен конференциялар ұйымдастыру, оқытушы мамандармен өзара алмасу және студенттердің білімін дамыту бағдарламалары шеңберінде жүзеге асырылады. Университет 60-тан астам білім-мекемелер, халықаралық ұйымдар және университеттермен серіктестік қатынас орнатқан. СДУ келісім негізінде АҚШ, Ұлыбритания, Швейцария, Оңтүстік Корея, Қытай, Түркия және Пакистан елдерінің серіктестерімен, сондай-ақ ТМД (Ресей, Армения, Азербайжан және Қырғызстан) университеттерімен тұрақты және перспективті байланыс орнатты.

Сыртқы сілтемелер

• Сулейман Демирел атындағы Университетінің ресми торабы Мұрағатталған 29 қаңтардың 2012 жылы.
• bil.edu.kz — «Білім-Инновация» қоғамдық қорының ресми сайты.