Сұлтанғали Шүкіров

Сұлтанғали Шүкіров (18.1.1946 жылы туған, Ақтөбе облысы Мүғалжар ауданы Мүғалжар станциясы) - эстрада-цирк артисі, Қазақстанның халық артисі (1986). 1967 жылы Алматы эстрада-цирк студиясын бітірді. Сол жылдан "Қазақ-концерт" артисі. 1972, 1976, 1983 жылдары Мәскеуде Эстрада өнерінің бүкіл-одақтық шығарм. шеберханасында оқыды. 1978 жылы Карлови Вари мен Парижде, 1979 жылы Брюссельде бүкіл дүние жүзі сиқыршы-иллюзианистерінің байқауында "Қандай ғажап бұл әлем" (муз. Д.Ф. Тухмановтікі) атты композициясымен "Гран-При" жүлделеріне ие болды. Сондай-ақ, Мәскеу қаласында (1974) Бүкілодақтық эстрада артистерінің, Гаванада өткен (1978) Жастар мен студенттердің бүкіл дүниежүзілік 11-фестивалінің лауреаты атанды. Бүкілодақтық Комсомол сыйлық иегері (1980). Қазіргі эстрада және цирк өнері колледжінде педагогика қызметпен шұғылданады. Қазақ мемлекеттік қуыршақ театрының көркемдік жетекшісі.