Сәтбаевтың мемориалдық мұражайы

Сәтбаевтың мемориалдық мұражайы - Павлодар облысы Баянауыл ауылындағы мәдениет-ағарту мекемесі.

Академик Қ.И.Сәтбаевтың Баянауыл мемориалдық музейі
Құрылған уақыты	1964 жыл
Орналасқан жері	Қазақстан, Павлодар облысы, Баянауыл ауылы, Сәтбаев көшесі, 38

Көрнекті ғалым және қоғам қайраткері Қ. Сәтбаевтың құрметіне 1964 ж. Баянауыл ауданы мәдениет үйінде құрылған. 1967 жылдан өз алдына жеке мекеме. Мұражайдың негізгі міндеті - ұлы ғалымға қатысты экспонаттарды жинау, толықтыру, зерделеу және сақтау жұмыстарын ұйымдастыру, мәдени құндылықтарды қалпына келтіру, дәрістер, көрмелер, экскурсиялар өткізу. Сәтбаевтың өмірі мен шығармашылығына, ғылымдағы жолына арналған бұл мұражай төрт залдан тұрады. Әрбір залдан ғалымның балалық шағы, Семей мен Баянауылда өткен жастық күндері, кенді Жезқазғанда жұмыс істеген жылдары жайында толық мағлұмат алуға болады. Мұражайда Сәтбаевтың Жезқазған, Ұлытау, Торғай, Атбасар, Есіл өңірлерін аралап, кен орындарын іздеп тапқаны, оның экономиканы өркендетуге қосқан үлесі, Ертіс - Қарағанды каналына сіңірген еңбегі жайында көптеген деректер жиналған. Келушілерге арналған 60 орындық кинозалдан ұлы ғалым жайында, Баянауылдан шыққан ғұламалар, ақын-жазушылар, ғалымдар, өнер адамдары жайында кинофильмдер көруге болады. Мұражайдың Торайғыров және Жаңажол ауылында екі бөлімшесі жұмыс істейді.