Такелаж

Такелаж (голл. takelage) – рангоутты (кеменің палуба үстілік құрылыстары) бекітуге, желкендерді басқаруға және жүк көтеру жұмыстарына арналған жабдықтардың жиынтығы.

Такелаж сызбанұсқасы

Қолданыста

Орнықты такелаж рангоуттың кейбір бөліктерін (мачта, стеньг т.б) қозғалтпай ұстап тұруы үшін қажет. Болат арқандардан, шынжырлардан құралған орнықты такелаждың екі жағы (ұшы) мықтап бекітіліп қойылады. Жылжымалы такелаж сигналдық белгілерді, шлюпканы, жебені, жүкті т.б. көтеріп-түсіру үшін, ал желкенді кемелерде ол рангоуттың қозғалмалы бөлігі мен желкендерді басқару үшін пайдаланылады. Мұндай такелаждың бір ұшы қозғалмайтындай етіп (не жылжымалы элементке ) бекітілсе, екінші ұшы күштік механизмге (не уақытша түрде) бекітіледі. Рангоуттың жылжымалы такелажына фал, шкот, штов, галс т.б жатады. Ауыр жүктерді көтеруге арналған құрылғылар мен трос, строп, шынжырларды, сондай-ақ монтаждау, құрылыстық т.б. жұмыстарда пайдаланылатын құрал-жабдықтарды да айтады.