Темір тапшылық анемиясының жіктемесі

Темір тапшылық күйлер амбулаторлық-клиникалық тәжірибеде жиі кездесетін, темір алмасудың бұзылысымен жүретін адамның микроэлементоздарының бір түрі және қазіргі көзқарас бойынша оның 3 сатысын ажыратады (А.А. Бугланов, 2000; Л.И. Дворецкий, 1999).
1. Жасырын алды сатысы – тіндік темір тапшылығының клиникалық белгілерінің болмауына, қан сарысунда темір мен трансферриннің темірге қанығу коэффициентінің қалыпты болуына қарамастан, ферритиннің төмендеуге және тасымалдаушы протеин – трансферриннің жоғарылауға бейімділігі байқалып, ішектен темір сіңірілуінің артып, сүйек миында темір деңгейі төмендейді;
2. Жасырын темір тапшылығы сатысы – қан сарысуында темір, ферритин төмен, ал трансферрин жоғары және трансферриннің темірге қанығу коэффициенті кем, бірақ тіндік темір тапшылығының клиникалық белгілерінің болуына қарамастан, анемия дамымайды, яғни гемоглобин мен эритроциттер көрсеткіштері қалыпты болады;
3. Темір тапшылық анемиясы немесе манифестік сатысы – темірдің барлық метаболизмдік қорларының кемуі және гемоглобин мен эритроциттер көрсеткіштерінің төмендеуі

Темір тапшылығының кезеңдері кестеде көрсетілген.

Темір тапшылық күйлердің кезеңдері

Темір тапшылық анемиясының алып келген этиологиялық себептері ескеріле отырылып жасалған Л.И. Идельсон (1980), Ю.Г. Митерев, Л.Н. Воронинаның (1992) жіктемесі:
• созылмалы қан жоғалтуларға байланысты дамыған созылмалы постгеморрагиялық темір тапшылық анемиясы;
• ағзада темірге деген сұраныстың артуы кезеңіндегі ТТА (жас- өспірімдер бойының күрт өсу, акселерация және жыныстық жетілу кезеңдері);
• нутрициондық немесе алиментарлы (тағамдық) ТТА;
• осы биометалдың сіңірілуінің жетіспеушілігі кезіндегі ТТА (постгастрорезекциялық және агастралды ТТА);
• генетикалық ақаулар салдарынан дамыған ТТА (гипо- немесе атрансферринемия).