Теңіз сонасы

Пішіні қорапқа ұқсас теңізде қалқып жүретін шағын медузаны – «теңіз сонасы» деп атайды. Адам үшін ең қауіпті улы жәндіктердің бірі. Австралия суларын мекендейтін ең улы тіршілік иесі. Теңіз сонасын жұрт «Австралия жағажайларының құбыжығы» деп те атайды.

Теңіз сонасының төрт бұрышынан ұзындығы 80 см-ге жететін бір немесе бірнеше улы қармалауыштар тарайды. Оның уының күші ересек адамды үш минуттың ішінде өлімге душар етеді. Қармалауыштары бекіген бұрыштардың арасында 6 көзі болады. Олардың екеуі өте жақсы көреді.

Әрбір қармалауышта 500, 1000 бұлшық ет ұлпасы түзілген, гарпун тәрізді инелері арқылы жемтігін шағады. Қармалауыштарының тармағына тиіп кетсең-ақ болғаны, оттай күйдіріп жібереді. Одан адам денесінде қып-қызыл тыртық қалады. Уының қаншалықты дарығанына байланысты шаққан жәндіктердің денесінің денесінде әртүрлі белгілер байқалады. Ал адамды шаққан жағдайда басы ауырып, лоқсиды, тыныс мүшелері жансызданып, жүрек соғысы тоқтайды.

Австралияда жылан, акула, қолтырауыннан төнетін қауіпке қарағанда теңіз сонасының шағуынан көптеген адамдар көз жұмады. Теңіз сонасы – Үлкен тосқауыл рифі жағалауларында көп кездеседі. Бұл медузалар Ируканджи қауіпті медузаларына ұқсайды. Теңіз сонасы жүзіп жүріп, жемтігін шапшаңдықпен аулайды. Олар өте жылдам, секундына 1,8 м аралықта жүзеді. Сонымен қатар жүзу бағытын оңай өзгерте алады.