Туарегтер

Туарегтер (өзд. атауы – имошаг) – берберлер тобына жататын халық. Малиде (600 мың адам), Буркина-Фасода (270 мың адам), Нигерде (240 мың адам), Алжирде (20 мың адам), Ливияда (20 мың адам) тұрады. Жалпы саны 1,15 млн. адам (1995). Үлкен еуропалық нәсілдің үнді-жерортатеңіздік тобына жатады. Оңтүстігінде көршілес негр халқымен араласып кеткен. Тамашек тілінде сөйлейді, сондай-ақ араб тілі қолданылады. Жазуы араб қарпіне негізделген, тек Сахара Туарегтері тұрмыста көне бербер жазуы – тифинагтың қалдықтарын сақтап қалған. Діні – мұсылман-сүнниттер. Туарегтер – Солтүстік Африкадағы ежелгі бербер халқының ұрпақтары. Олар арабтар жаулап алған кезде Сахараға қарай ойысқан жартылай көшпелілер. Бір бөлігі мал бағады, бір бөлігі егін салады.