Түнде көру құралдары

Түнде көру құралдары (ТКҚ) — нысананың (объектінің) инфрақызыл (көрінбейтін) бейнесін жай көзге көрінетін бейнеге айналдыруға арналған қондырғы. Олар түнде, тұманда ұрыс техникасын көруге, атыс және баска қаруынан көздеп атуға, ұрыс даласындағы нысананы табуға, қарсыластар әрекетін бақылауға мүмкіндік береді. Әскери істе активті және пассивті түнде көру құралдары колданылады. Пассивті түнде көру құралдарына өзі шығаратын сәуле негізінде нысананы (объектіні) таба алатын жылу пеленгаторлық станциялар (қараңыз) жатады. Пассивті әсер ететін құралдар нысананы тапқан кезде тек белгі не сигнал береді, бірақ оның бейнесін бермейді. Объект немесе нысананың толық бейнесін жеткілікті мөлшерде күшті инфрақызыл сәуле шығаратын активті Түнде көру құралдары бере алады. Бұл сәуленің шағылысы объект немесе нысананы экранға бейнелейді. Түнде көру құралдары бронетранспортерлерге, танк, автомобильдерге, қаруларға, зеңбіректер мен автоматтарға орнатылады. Қаруларға орнатылған құралдар түнгі көздеуіштер болып табылады. Әскерлерде неғұрлым алыс нысаналарды күндіз, тұманда және түнде инфрақызыл суретке түсіру кеңінен қолданылады. Олар жер үсті нысаналары мен объектілерін, снаряд жарылыстарын, бомбалау нәтижелерін және т.б. суретке түсіруге мүмкіндік береді.

Кенияда түнгі көру көзілдірігін қолданатын ұшқыш