Убидайық (Үйбидайық, Lalium) — астық тұқымдасына жататын көпжылдық не бір жылдық шөп. Гүл шоғыры екі қатар масақ. Убидайықтың жер шарында 15, КСРО-да 9, оның ішінде Қазақстанда 5 түрі кездеседі. Көп жылдық убидайық Кавказда, Батыс Сібір және Орта Азияда шабындық, тау беткейлерінде, бақ және парктерде өседі. Тұяқкесті жайылымда тез өседі. Көп гүлді убидайық — малға құнарлы жемшөп. Бір жылдық убидайық Еуропаның солтүстік және орталық аудандарында, Кавказ сыртында, Сібірде, Қиыр Шығыста таралған. Бұл — жаздық бидайдың өсуін тежейтін арам шөп. Дәнінде улы саңырауқұлақ болатындықтан ұнға, мал жеміне араласса адам, мал уланады. Уланған мал делсалданады, көзінің қарашағы үлкейеді, бұлшық еттері дірілдейді, жүрек соғуы жиілейді, іш тастайды. Уланған малға іш жүргізетін тұз ерітіндісін ішкізеді. Күрес шаралары: тұқымды тазарту, егін жинағаннан кейін аңызды тазарту және ерте сүдісер жырту. [1]
- ↑ Қазақ Совет энциклопедиясы: Алматы, 1977. 11 том.
