Флювиогляциал шөгінділер

ФЛЮВИОГЛЯЦИАЛ ШӨГІНДІЛЕР (лат. fluvіus — ағын, тасқын, glacіes — мұз) — еріген мұз сулары тасқынынан жиналған шөгінді тау жыныстары. Флювиогляциал шөгінділер малта, қиыршық тастардан, жұмыр тасты құмнан, құмдақтан, саздақтан және саздан тұрады. Ол баяу іріктелген, түйірлері қырлы, минералдық құрамы әр түрлі, қиғаш қабатты болып келеді, көне мұзбасу аймақтарында мол тараған. Орналасу типіне байланысты: интрагляциалды (мұздықтар ішінде), перигляциалды (мұздыққа таяу) болып бөлінеді. Бастапқысы оз және друмлиндер сияқты аккумуляц. рельефті, кейінгісі зандрларды қалыптастырады. Флювиогляциал шөгінділер морена бетінде, арасында және түбінде шоғырланады. Мұз басқан аймақтан алыстаған сайын Флювиогляциал шөгінділер құрамында ұсақ түйірлі материалдар молая түседі. Флювиогляциал шөгінділер жол құрылысында бетон толтырғышы ретінде кеңінен пайдаланылады. Флювиогляциал шөгінділер жер асты сулары көп жиналады.