Фотограмметриялық аспаптар

Фотограмметриялық аспаптар — фотосуреттері бойынша объектілердің пішінін, мөлшерін және олардың кеңістіктегі орнын анықтауға арналған құрал-жабдықтар.

Олар жеке фотосуреттерді өңдеуге арналған және стереоскоп. қос суреттерді өңдеуге арналған стереофотограмметр. приборлар болып екі топқа бөлінеді. Берілген масштабта заттардың жазық кескінін фотосурет бойынша алу үшін фототрансформаторлар пайдаланылады. Фототрансформаторларға қарағанда стерео-фотограмметриялық приборлардың (стереоскоп, стереометр, стереопроектор, стереограф, т.б.) өлшеу дәлдігі өте жоғары болып келеді. Универсал стереофотограмметриялық приборлар қос фотосурет бойынша суретке түсірілген объектінің кеңістіктік моделін қалпына келтіруге әрі өлшеуге мүмкіндік береді. Оның өлшеу нәтижесі топографиялық план ретінде қағазға сызылып отырады. Стереопроектор мен стереограф арқылы әр түрлі фокус аралық қашықтығы бар аэрофотокамералармен түсірілген фотосуреттер өңделеді.