Халекет Ешмұратұлы Ешмұратов

Халекет (Халеолла) Ешмұратұлы Ешмұратов (1918, Шарбақты ауданы, Павлодар облысы - 5 қазан 1999, Семей) — театр актері, Қазақ КСР еңбек сіңірген әртісі.

Халекет (Халеолла) Ешмұратұлы Ешмұратов
Туған күні	1918 (1918)
Туған жері	Шарбақты ауданы, Павлодар облысы
Қайтыс болған күні	5 қазан 1999 (1999-10-05)
Қайтыс болған жері	Семей
Қызметі	актер
Белсенді жылдары	1944 - 1999
Театр	Абай атындағы Семей мемлекеттік қазақ музыкалық драма театры
Марапаттары

Өмірбаяны

Халекет (Халеолла) Ешмұратұлы Ешмұратов 1918 жылы Павлодар облысы, Шарбақты ауданында дүниеге келген. Ата-анадан ерте айырылған ол Семей қаласындағы № 1 балалар үйінде тәрбиеленеді.

Бала күнінен әнге, өнерге қүштар Халекет Семейдегі Тау-кен техникумында оқып жүрген кезінде көркемөнерпаздар үйірмесіне қатысатын. Мұнда шынайы өнерімен, әншілік қабілетімен көпшіліктің көзіне түскен зерек жігіт 1938 жылы арнайы жолдамамен облыстық театрға келді.

1939 жылы Қызыл әскер қатарына шақырылды. Ол үш соғыста ұрыс қимылдарына қатысушы: Халхин-Голдағы, фин және Ұлы Отан. 1944 жылы ауыр жарақат алғаннан кейін ол үшін соғыс аяқталды.

Майданнан оралғаннан кейін Семей қаласындағы Абай атындағы Семей мемлекеттік қазақ музыкалық драма театрына оралды. Жалындаған жастық шағы соғыспен түспа-түс келген Х.Ешмұратов майдан даласынан жараланып келгеннен кейін өмірін халықтың мәдениетін арттыру, сахна арқылы жақсы мен жаманды таразылау принципіне арнап, Семей театрында түрлі образдың түрлі тағдырымен бетпе-бет келді.

Ойнаған рөлдері

Семей облыстық театрда еңбек еткен 55 жыл ішінде ол Жапал, Кебек, Есен, Жүніс, Айдар, Оразбай, Әлібек (М.Әуезов «Еңлік — Кебек», «Түнгі сарын», «Абай», «Айман — Шолпан»), Ақан, Қоңқай, Қозы, Төлеген (Ғ.Мүсірепов «Ақан сері — Ақтоқты», «Қозы Көрпеш — Баян сүлу», «Қыз Жібек»), Әбіш (Б.Майлин «Шүға»), Мүрат (Ә.Тәжібаев «Майра»), Доброходов (М.Ақынжанов «Ыбырай Алтынсарин»), Фархад (Н.Хикмет «Махаббат туралы аңыз»), Шпекин, Кочкарев (Гоголь «Ревизор», «Үйлену»), Сайран (Ә.Әбішев «Достық пен махаббат»), Джон Грей (Қ.Мүхамеджанов «Жат елде»), Митя (Н.Островский «Кедейлік үят емес»), Филипп (И.О.Дунаевский «Еркін жел»), Доктор (К.Гольдони «Екі мырзаға бір қызметші»), Андрейка (А.Александров «Малиновкадағы той»), Тоқтамыс батыр (М.Ибраев «Жігер»), Ақылбек (Б.Жақиев «Әке тағдыры») тәрізді басқа да тағдыры әр алуан, өмір сүрген дәуірі әртүрлі, мінез-құлқы бір-біріне ұқсамайтын 300-дей кейіпкерді сахнаға шығарды. Х.Ешмұратов сомдаған образдар көбінде ішкі жан дүниесі бай, өмірге күштар, қандай іске де ақылмен келетін оптимист жандар болатын.

Марапаттары

Ұлы Отан соғысының II дәрежелі ордені