Ханкелді Сырымбетұлы – қазақ батыры. 1688 жылы дүниеге келіп, 1763 жылы қайтыс болған. Ханкелді батыр Ұлы жүздің албан тайпасының алжан руынан шыққан. Ханкелді жоңғар басқыншылығына қарсы талай шайқастарға қатысқан. Ол Аягөз, Тесіктас жерінде жоңғарлармен болған шайқастарда ерекше көзге түскен, Аңырақай соғысына қатысқан. Жоңғар басқыншылына қарсы күресте үлкен ұлы Тілеуке де әкесімен бірге жауға шапқан. Немересі Райымбек те осы шайқастарға қатысты. Ханкелді батыр сол кездердің жағдайына орай Ұлы жүз қазақтарының Ресейге қосылуына ел ағаларымен бірге елеулі үлес қосады.

1733 жылы Төле би, Сатай және Бөлек батырлармен бірге Ханкелді батыр да орыс мемлекетіне қарауға тілек білдіріп, патшаға хат жазады. Бұл алғашқы хатты Аралбай және Оразкелді батырлар жеткізсе, 1734 жылы жазылған екінші хатты Петерборға тікелей Ханкелді батыр және Төле бидің немере інісі Айтбай екеуі апарады.