Шағылыс жасы

Шағылыс жасы - малдың шаруашылық тұрғысынан алғашқы шағылысқа түсуге не ұрықтандырылуға қолайлы жасы. Малдың шағылыс жасын белгілегенде оның ертерек қалыптасатын жыныстық жетілуімен қатар одан кейін толысатын жалпы физиологиялық-шаруашылық қасиеттерінің (тірілей салмағы, іріленіп өсуі ж.б.) қалыптасу мерзімін ескереді. Мысалы, мүйізді ірі қара мал жыныстық қабілеттілігі - 6-8 айда жетілгенмен, шағылыс жасы толысатын шаруашылық жетілуі - 14-18 айында қалыптасады. Сол секілді, жылқының жыныстық жетілуі - 8-9 ай, шағылыс жасы - 24-48 ай, қойдікі, тиісінше, 5-6 және 10-18 ай, шошқанікі - 4-5 және 8-12 ай, түйенікі - 30-36 және 48-60 ай. Шағылыс жасына жетпей, яғни өз организмі әлі толық өсіп-жетілмей, шағылыстырылған (қашырылған не ұрықтандырылған) малдың ерте буаздықтан өсіп-жетілуі баяулап, төлі ұсақ, әлжуаз туылады.