Шри-Ланка коммунистік партиясы

Шри-Ланка коммунистік партиясы – елдегі кейбір коммунистік топтар мен Біріккен социалистік партияның негізінде 1943 жылы 3 шілдеде құрылды.

1972 жылы Шри-Ланка Республикасы болып жарияланғанға дейін Цейлон Коммунистік партиясы деп аталды. Компартия Цейлонды ағылшын отарлық үстемдігінен азат ету жолында батыр күрес жүргізді. Компартияның 1-съезі 1945 жылы сәірде болып өтті. Цейлон тәуелсіздік алғаннан кейін (1948) Компартия басқа демократиялық күштермен бірге отаршылдық қалдығын жедел жою жолында, ішкі реакцияға қарсы күресті. Компартия Соломон Бандаранаике бастаған демократиялық коалициялық үкіметтің (1956 – 59) өкімет басына келуіне көмектесті, оның антиимпериалистік және демократиялық программасын қолдады. Компартия Сиримаво Бандаранаике үкіметінің (1960 – 65) прогрестік антиимпериалистік шараларын жақтады.

1965 жылғы парламент сайлауынан кейін Коммунистік партия парламентте 4 орынға ие болды. Цейлон ерікті партиясымен және Цейлон социалистік партиясымен бірге Компартия Дадли Ш. Сенанаяке үкіметіне (1965 – 70) қарсы демократиялық оппозиция құрды. 1968 жылы бірігіп қимыл жасау программасы жасалды да, бұл партиялардың Біріккен майданы құрылды. Программада экономиканы жоспарлы түрде өркендету, коммерциялық банкілерді национализациялау, елді индустрияландыру, өте қажетті тауарларды импортқа шығаруға мемлекет бақылау орнату мақсаты көзделді, ауыл шаруашылық өнімдерін көбейту, шаруалардың жағдайын жақсарту үшін ауыл шаруашылығында реформалар жүргізу белгіленді.

Компартия делегациялары Коммунистік және жұмысшы партияларының халықаралық кеңестеріне (Мәскеу, 1957, 1960, 1969) қатысты. Компартия кеңестерде қабылданған құжаттарды мақұлдады.