Шәрипа Битаева

Битаева Шәрипа (6.5. 1953. Түркістан облысы, Жетісай қаласы) — тележурналист.

ҚазМУ-ді бітірген (1973). Еңбек жолын Ақтау қаласындағы облыстық теледидарда редакторлықтан бастады. Ол жүргізген балаларға арналған "Жеткіншек" бағдарламасы, жастарға арналған "Жалын" бағдарламасы көрерменнің көзайымына айналды. "Құрбылар" телеальманахы осы өлкенің қыз-келіншектеріне арналса, "Денсаулық" бағдарламасы медицина саласын қамтыды.

1985-99 жылдары Қазақ теледидарының ғылыми көпшілік және оқулық бас редакциясында, "Таңшолпан" бағдарламасында редактор, аға редактор, телекомментатор, 1999-2000 жылдары «Гала-ТВ» студиясында "Тілашар" бағдарламасының жетекшісі, 2000-2002 жылдары "Өлке" баспасында коммерциялық директор, 2004 жылдан бастап Халықаралық «Түркі әлемі» және "Ауыл" студияларында редактор, продюсер болып қызмет істейді. Осы жылдар ішінде ата-аналарға арналған "Балауса", қолданбалы қазақ өнеріне арналған "Шебердің қолы ортақ", Жоғары сынып оқушыларына арналған интеллектуалдық телеойын бағдарламасы "Сиқырлы Қазан", отбасыға арналған "Шанырақ" жанұялық телевикторина республика жұртшылығының сүйікті бағдарламаларына айналды.

1997-98 жылдары екі тілде шығып тұрған "Жаңа заман келбеті"-"Люди нового поколения" атты бағдарламасы отандық кәсіпкерлер өмірінен сыр шертті. 1979 жыл]ы Павлодар қаласында өткен "Жолдас" IX Республикалық телефестивалінде "Байрон ән шырқайды" муз. бағдарламасы жүлделі орынға ие болды. Қазақстан журналистер одағының мүшесі.