Шәріпбай Қашқынбайұлы Сәкиев

Шәріпбай Қашқынбайұлы Сәкиев (20.12.1913 жылы туған, Байзақ ауданы) – актер, Қазақстанның халық артисі (1966).

Дулат тайпасының Жаныс руынан.

Ташкенттің А.Н. Островский атындағы театр-көркемсурет институтының режиссерлік факультетінде оқыған. Шығармашылық жолын 1936 жылы бастады. Ол – Жамбыл облыстық драма театрының негізін салушылардың бірі. Мұнда әр алуан рөлдерде ойнады: Амангелді, Қозы (Мүсіреповтің осы аттас драмасы мен «Қозы Көрпеш – Баян сұлуында»), Кебек, Еспембет, Қобыланды (Әуезовтің «Еңлік – Кебегі» мен «Қарақыпшақ Қобыландысында»), Скапен (Мольердің «Скапеннің айласында»), Труффальдино (Гольдонидың «Екі мырзаға бір қызметкерінде»), Қадырқұл (Хамзаның «Бай мен кедейінде»), Алдар Көсе (Құсайыновтың осы аттас комедиясында) т.б. «Ер Тарғын», «Айман – Шолпан», «Қыз Жібек» секілді музыкалық спектакльдерге қатысып, Тарғын, Көтібар, Бекежан рөлдерін ойнаған. Сәкиев – драматургияның түрлі жанрларындағы жағымды, жағымсыз кейіпкерлердің рөлдерін ойнап, адамдардың мінез-құлқы мен психологиялық жай-күйін дәл бейнелеген. Сахналық әрекет пен ойды ұштастыра білетін жан-жақты білікті актер. 1958 жылы Мәскеуде өткен қазақ әдебиеті мен өнерінің онкүндігіне Мұхтар Әуезов атындағы академиялық қазақ драма театрының құрамында М.Әуезовтің «Еңлік-Кебегінде» Еспенбет рөлімен қатысты. Сәкиев режиссурамен де шұғылданып, спектакльдер қойған. «Құрмет Белгісі» орденімен, медальдармен марапатталған.