Экуадорлықтар, Эквадорлықтар (өзд. атауы – экуаториано) – Экуадордың негізгі халқы. Жалпы саны 6,2 млн. адам (2004). ФРГ, АҚШ және Латын Америкасы елдерінде де тұратындары бар. Э-дың ірі этносаралық топтары – испан-үндіс метистері, ақ (креол) және қара нәсілдер, мулаттар. Испан тілінде сөйлейді, сондай-ақ кечуа тілі кең тараған. Басым бөлігі христиан дінінің католик, біразы протестант тармақтарын тұтынады. Қазіргі Э-дың қалыптасуында жергілікті тайпалар мен испан отаршылары көп рөл атқарған. 16 ғ-дың бас кезінде жергілікті үндіс тайпаларын инктер жаулап алды. 1534 – 1822 ж. испан отаршылдығы тұсында үндістердің көпшілігі кечуа тілін меңгеріп, соған көше бастады. Бұған қоса отаршылдық әсерінен мұндағы халық испан тілі мен мәдениетін бойына сіңірді. Дәстүрлі киімдері мен тағамдары испандықтарға ұқсас. Әйелдер төбесі жайпақ “қайық” қалпақ, үстеріне жамылғы, жеңсіз көйлек, ұзын юбка киген. Ерлер басына қалпақ, үстіне жамылғы, бұтына шалбар киіп жүрген. Дәстүрлі ш. – егін егу. Жүгері, картоп, банан, т.б. дәнді-дақылдар өсірген. Қой ш. да жақсы дамыған. Ауылдық жерлерде өзара көмек түрі (минга) сақталған. Қалалы жерлерде баспана шикі кірпіштен, тропиктік аудандарда ағаштан тұрғызылады. Ауыз әдебиетінің үлгілері мол.