Югославия Социалистік Федеративті Республикасы

Югославия халқының социалистік одағы – Халық-азаттық майданы негізінде туған бұқаралық қоғамдық-саяси ұғым; Югославиядағы 1941-45 жылдардағы Халық-азаттық соғысы кезінде жұмысшы табының басшылығымен барлық патриоттық және антифашистік күштердің бұқаралық ұйымы ретінде құрылды.

Халық-азаттық майданға Югославия Коммунистік партиясы басшылық етті. 1945 жылдан Югославия халық майданы деп аталды. 1953 жылы ақпанда Югославия халық майданы Югославия халқының социалистік одағы болып өзгертілді. 1975 жылғы устав бойынша Югославия халқының социалистік одағы жұмысшы табы, шаруалар қауымы, интелегенция және қоғамдағы барлық еңбекшілер тобы бірлік қимылының қоғамдық-саяси формасы болып табылады. Еңбекшілер мен басқа да азаматтар Югославия халқының социалистік одағы ұйымына тікелей немесе Югославия еңбекші халқының социалистік одағының жұмысына қатысатын қоғамдық-саяси, қоғамдық ұйымдар және бірлестіктер арқылы кіреді. Югославия халқының социалистік одағының ұйымдық негізі – аумақтық принцип бойынша құрылған жергілікті ұйымдар, жоғары органы – Одақтық конференция. Өте маңызды саяси шешім-қарарлар қабылдау үшін Югославия халқының социалистік одағы съезі шақырылады. Одақтық конференцияның саяси атқару органы – хатшылық сайлайтын төралқа. Югославия халқының социалистік одағының 8,5 млн. адамнан астам мүшесі бар (1975). Одақтың конференция төрағасы – Д. Петрович-Шане (1977 жылы 21 шілдеде дүниеден озған). Орталық органы – «Борьба» газеті (1954 жылдан шығарылуда).