Янгуразов көпестің үйі

Янгуразов көпестің үйі («Келін үйі») – Солтүстік Қазақстан облысының республикалық маңызы бар тарих және мәдениет ескерткіштері тізіміне енген қала құрылысы және сәулет ескерткіші.

Янгуразов көпестің үйі, қазіргі Тарихи-мәдени мұраны қорғау және пайдалану орталығы
Бұрынғы атауы	Янгуразов көпестің үйі
Жалпы мәлімет
Статусы	Республикалық маңызы бар сәулет ескерткіші
Сәулет стилі	қала құрылысы және сәулет
Мекен жайы	Ульянов және Горький көшелерінің қиылысы
Орналасқан қала	Петропавл
Құрылысы басталды	1914 жыл

Орналасқан жері

Петропавл қаласындағы Ульянов және Горький көшелерінің қиылысында орналасқан екіқабатты тұрғын үй.

Сипаты

Үйдің сыртқы көрінісі тастан жасалғандай. Бірақ шын мәнінде оның құрылысы ағаштан жасалып, сыртқы қабаты сылақпен сыланған. 1914 жылы салынған аталмыш ағаш-кірпішті үйдің құрылысына қолданған материалдардың ішінде гипс бар. Ал карнизі оюлармен әспеттелген.

Тарихы

XIX ғасырдың аяғы XX ғасырдың басында салынған көпестер үйі халық арасында «Келін үйі» деп тегін аталмаған. Оның бой көтеруінің өзі сезімге толы хикаямен байланысты. Аңызға сүйенер болсақ, Янгузаров көпес Петербургте бір қызға құлай ғашық болып қалады. Оны өмірлік жары еткісі келген ол оған тұрмысқа шығуға ұсынысын жасады. Бірақ кербез сұлудың көпеске қояр бір шарты бар еді. Егер көпес оған Петропавлда Петербургтегі үйінің тура көшірмесін тұрғызған жағдайда ғана тұрмысқа шығамын деп уәде береді. Оның талабын Янгузаров екі айтқызбастан орындайды. Кей мәліметтерге сүйенер болсақ, үй тұрғызылғанмен той болмаған. Себебі көпес аяқ астынан сырқаттанып, төсек тартып, мезгілсіз қайтыс болған. Ал кей деректерде қос ғашық, бақытты да алаңсыз ғұмыр кешкен. Кеңес үкіметінің алғашқы жылдары бұл ғимарат Петропавлдағы совдептің әкімшілік ғимараты болған. Ал өткен ғасырдың 20-ыншы жылдары бұл үйде ерекше айрықша қызметтегі штаб құрылымы орналасып, мұнда жерлес жазушы Сабит Мұқанов қызмет еткен деген деректер де кездеседі. 60-ыншы жылдары ғимаратта облыстық қаржы бөлімі орналасты. Қазіргі таңда ғимаратқа қайта жаңғырту жұмыстары жүргізіліп жатыр.