Ғарыштық құқық

Ғарыштық құқық - ғарышты зерттеп, пайдалануға қатысы бар мемлекеттердің, сондай-ақ халықаралық ұйымдардың қарым-қатынасын реттейтін әрі ғарыш кеңістігі мен аспан денелерін пайдалану режимін айқындайтын құқықтық жосындар жиынтығы, халықаралық құқықтың бір саласы. Ғарыштық құқықтың жосындарын БҰҰ, соның ішінде 1959 ж. Бас Ассамблеяның көмекші органы ретінде құрылған Ғарыш кеңістігін бейбіт мақсатта пайдалану жөніндегі к-т әзірлейді.

Ғарыштық құқықтың бастаулары

Ғарыштық құқықтың бастаулары - "Айды және басқа аспан денелерін қоса алғанда, ғарыш кеңістігін зерттеу мен пайдалану жөніндегі мемлекеттер қызметінің принциптері туралы келісімшарт" (1967) "Ғарышкерлерді құтқару, ғарыш кеңістігіне ұшырылған ғарышкерлер мен нысандарды кері қайтару туралы келісім" (1968), "Ғарыштық нысандардың шектірген залалы үшін халықаралық жауапкершілік туралы конвенция" (1972) "Ғарыш кеңістігіне ұшырылған нысандарды тіркеу туралы конвенция" (1975) "Айдағы және басқа аспан денелеріндегі мемлекеттердің қызметі туралы келісім" (1979). Сондай-ақ, мемлекеттердің аспан әлемін бірлесе игеру әрекеттерін реттейтін халықаралық ғылыми-техникалық құжаттар да ғарыштық құқықтың негізгі бастауларының бірі саналады. Олар, негізінен, үкіметаралық ұйымдардың құрылтайшылық актілерін, мемлекеттердің ғарыштағы бірлескен әрекеттерінің жалпы да нақты мәселелері жөніндегі екі жақты не көп тарапты келісімдерін қамтиды.

Дереккөздер

Қазақстан Ұлттық Энциклопедия. 3 том. ISBN 5-89800-149-2